Almatyda shetel azamatyna til tıgizip, kúsh kórsetken er adam ustaldy
ALMATY. KAZINFORM – Almatyda shetel azamatyna til tıgizip, kúsh kórsetken er adam ustalyp, sot sheshimimen 10 táýlikke ákimshilik qamaqqa alyndy. Bul týraly Almaty polıtsııa departamenti habarlady.
Vedomstvonyń málimetinshe, áleýmettik jelide jarııalanǵan aqparat polıtsııanyń tekserýine negiz bolǵan. Onda shetel azamaty qala ortalyǵynda serýendep júrgen kezde beıtanys er adamnyń ulttyq belgisi boıynsha balaǵattap, oǵan qol kótergeni jáne uıaly telefonyn tartyp alýǵa áreket jasaǵany aıtylǵan.
Oqıǵaǵa baılanysty Almaty polıtsııa departamenti Almaly aýdandyq polıtsııa basqarmasynyń qyzmetkerleri kúdiktiniń jeke basyn jedel anyqtap, ony ustady.
– Tekserý nátıjesinde quqyq buzýshyǵa qatysty usaq buzaqylyq faktisi boıynsha ákimshilik hattama toltyryldy. Sot ony kináli dep tanyp, 10 táýlikke ákimshilik qamaqqa alý týraly sheshim shyǵardy, - delingen habarlamada.
Almaty polıtsııasy qoǵamdyq tártipti buzyp, azamattardyń qaýipsizdigine qaýip tóndiretin kez kelgen zańsyz áreketke jedel quqyqtyq baǵa beriletinin eskertti.
Eske salaıyq, buǵan deıin Almatyda týrısterden 150 dollar jolaqy alǵan taksı júrgizýshisi jazalanǵanyn jazǵan edik.
