Almatyda Shekara akademııasynyń kýrsanty qaıtys boldy: UQK túsinik berdi
ASTANA. KAZINFORM — Ulttyq qaýipsizdik komıteti búgin túnde Almatydaǵy Shekara akademııasy kýrsantynyń ólimine qatysty túsinikteme berdi.
«2024 jylǵy 22 qyrkúıekte Almaty qalasynyń kópqabatty turǵyn úıiniń aýlasynan kezekti demalysqa bosatylǵan 3-kýrs kýrsantynyń máıiti tabyldy. Ólimine bıikten qulaý sebep bolǵan. Polıtsııa organdary sotqa deıingi tergeýdi bastady. Túrtki bolǵan jaǵdaılar anyqtalyp jatyr», - dep jazylǵan UQK habarlamasynda.
Aıta keteıik, áleýmettik jelilerde UQK Shekara akademııasy kýrsantynyń qaza tapqany týraly aqparat tarady. Túngi ýaqytta 19 jastaǵy jigit Almatydaǵy Dostyq dańǵylyndaǵy kópqabatty úıden sekirip ketken. Bul fakti boıynsha Medeý aýdandyq polıtsııa bólimi qylmystyq is qozǵady.
«Oqıǵanyń sebebi men mán-jaıy anyqtalyp jatyr», - dep túsindirdi qalalyq Polıtsııa departamentiniń baspasóz qyzmeti.
