Almatyda ishek ınfektsııasymen aýyrǵandardyń sany 100-den asty
ALMATY. KAZINFORM – Almaty qalasynyń Bas memlekettik sanıtarııalyq dárigeri Qasymhan Alpysbaıuly jaz kezinde jemis-jıdekti barynsha muqııat jýyp jeýge keńes berdi.
Qasymhan Alpysbaıulynyń aıtýynsha, jiti ishek ınfektsııalary (JІI) - ishtiń aýyrýyna, ishtiń ótýine jáne qusýǵa ákeletin asqazan-ishek joldarynyń aýrýlary. Ol kókónis, jemis-jıdek jáne basqa da taǵamdardy jetkilikti túrde jýmaı tutynýdyń saldarynan aýrýshańdyq ósetinin atap ótti.
- Infektsııanyń lastanǵan sý qoımalarynda sýǵa túsý kezinde de berilýi múmkin ekenin umytpaǵan jón. Kez-kelgen jastaǵy adamdar jiti ishek ınfektsııalarymen aýyrady, biraq syrqattaný 6 jasqa deıingi balalar arasynda jıi kezdesedi. 2025 jyldyń 5 aıynda Almaty qalasynda jiti ishek ınfektsııasynyń 101 jaǵdaıy tirkeldi, onyń ishinde 14 jasqa deıingi balalar arasynda 46 jaǵdaı, - dedi ol.
Almaty qalasynyń sanıtarııalyq-epıdemıologııalyq baqylaý departamentiniń málimetinshe, ınfektsııanyń negizgi taralý joly - taǵam arqyly, onyń úlesi - 81,1% (82 jaǵdaı), turmystyq jol arqyly - 18,8% (19 jaǵdaı).
- Saýalnamaǵa sáıkes, naýqastardyń basym bóligi úı jaǵdaıynda sapasyz taǵam ónimderin tutynǵan, olardyń daıyndaý tehnologııasy men saqtaý sharttaryn (qus ónimderi, et jáne sút ónimderi) buzǵan, jeke bas gıgıenasyn saqtamaǵan. Іshek ınfektsııalarymen aýyrmaý úshin qarapaıym erejelerdi saqtaý qajet: dárethanaǵa barǵannan keıin, tamaq isher aldynda jáne tamaq daıyndaý aldynda qoldy sabynmen únemi jáne muqııat jýý, tek bótelkedegi nemese qaınatylǵan sýdy ishý jáne basqa da, - dedi Qasymhan Alpysbaıuly.
Eske salaıyq, buǵan deıin Aqmoladaǵy sport mektebinde 18 balada ishek ınfektsııasy anyqtalǵanyn jazǵanbyz.