Almatyda shatyrdan qulaǵan muzdan 4 adam jaraqat alǵan - kim jaýapty
ALMATY. KAZINFORM – Qys kezinde shatyrdy muzdan tazartý kimniń mindeti? Bul suraqty Kazinform tilshisi qarastyryp kórdi.
Almaty qalasy Qoǵamdyq densaýlyq saqtaý basqarmasynyń málimetinshe, megapolıste 2024 jyldyń jeltoqsan aıynan bastap qazirgi ýaqytqa deıin ǵımarat shatyrynan túsken muzdan 4 adam zardap shekken. Al taıǵanap qulap, zardap shekken turǵyndar sany – 4034. Olar 18-den 85-ke deıingi jas aralyǵyndaǵy azamattar.
Almaty ákimdiginiń jaýabyna sáıkes, bul suraq «Almaty qalasynyń aýmaǵyn abattandyrý qaǵıdalaryn bekitý týraly» erejeniń 156, 157 tarmaǵymen retteledi. Ol boıynsha kóppáterli turǵyn úılerdiń shatyrlaryn qardan jáne muzdan tazartý MIB (múlik ıeleri birlestigi) tóraǵasy ne ǵımarattardyń, qurylystardyń menshik ıeleri óz qarajaty esebinen mamandandyrylǵan uıymdardy jaldaý arqyly tazartýy qajet.
- Kórsetilgen erejelerdi buzǵan jaǵdaıda QR ÁQBtK № 505 baby boıynsha ákimshilik jaza qarastyrylǵan, - delingen ákimdik jaýabynda.
Aıta keteıik, eger MIB basshylyǵy ne ǵımarat ıeleri shatyrdy muzdan tazartý mindetterin ýaqtyly atqarmaıtyn bolsa, turǵyndar qalalyq Kommýnaldyq ınfraqurylymdy damytý basqarmasyna shaǵymdana alady.
Al Almaty qalalyq advokattar alqasynyń advokaty Alma Mýsınanyń aıtýynsha, ústine muz qulap zardap shekken adamdar ony tazalaýǵa mindetti tulǵalardan ótemaqy óndirip ala alady.
- Zań boıynsha densaýlyqqa keltirilgen zııan soǵan kináli adamnan óndiriledi. Demek, bul jerde muzdy tazalaýǵa mindetti tulǵa kim ekenin anyqtap alý qajet. Mysaly, kóp qabatty turǵyn úı bolsa, onda múlik ıeleri birlestigi. Eger múlik ıeleri birlestigi tóbedegi qar-muzdy tazalaý týraly basqa bir kompanııamen kelisimde bolsa, onda sol kompanııa da jaýapty bolady, - dedi ol.
Zańger sózinshe, zalaldy óndirý úshin eń aldymen dálel jınaqtaý qajet. Kamera beınejazbasy, fotosýretter, kýáler, jaraqat týraly medıtsınalyq qorytyndy - mundaı jaǵdaıda dálel bola alady.
- Muz qulap jaraqat alyp jatsańyz, jedel járdem men polıtsııa shaqyrǵanyńyz jón, olarda bolǵan oqıǵany tirkeıdi. Dálelderdi jınap jaýapty tulǵa ne mekemeni sotqa berip, emdelýge ketken shyǵyn jáne basqa da materıaldyq shyǵyndardy, moraldyq zalaldy óndire alasyz, - dedi Alma Mýsına.
Sonymen qatar zańger qulaǵan muzdan adam aýyr jaraqat alsa ne mert bolsa, onda qylmystyq is qozǵalatynyn atap ótti.
Eske salaıyq, buǵan deıin Bıyl Almatyda 30 seısmıkalyq stantsııa ornatylatynyn jazǵanbyz.