Almatyda Seıfýllın-Jansúgirov jolaıryǵy tamyz aıynda tolyq ashylady

ALMATY. KAZINFORM — Almatyda Seıfýllın dańǵyly men Jansúgirov kóshesiniń qıylysynda salynyp jatqan kólik jolaıryǵynyń qurylysy osy jyldyń tamyz aıynda aıaqtalady.

Bastapqyda jobany 2025 jyldyń maýsym aıynda aıaqtaý josparlanǵan. Alaıda qurylys jumystary qazir de júrip jatyr. Osyǵan baılanysty agenttik Almatynyń qalalyq mobıldilik basqarmasyna saýal joldady.

— Qazirgi tańda qurylys jumystary aıaqtalýǵa jaqyn. Qazir abattandyrý jumystary júrgizilip jatyr. Barlyq jumys, sonyń ishinde abattandyrý da tamyz aıynda tolyq aıaqtalady. Qozǵalys barlyq baǵytta ashyq, — dep habarlady basqarma.

Sonymen qatar vedomstvo jolaıryq janynda ornalasqan jaıaý júrginshiler ótkelderi jaıly túsinik berdi.

— Seıfýllın–Aqpaev jáne Jansúgirov–Aqpaev kósheleriniń qıylysynda múmkindigi shekteýli azamattar úshin jedelsatysy bar jaıaý júrginshilerge arnalǵan ótkelder qarastyrylǵan. Al Seıfýllın men Irkýtskaıa kóshesiniń, Jansúgirov pen Darvın kóshesiniń qıylysynda baǵdarshammen retteletin jer ústi ótkelderi bar, — delingen basqarma jaýabynda.

Jyl basynda Almatynyń eks-ákimi Erbolat Dosaev Seıfýllın men Jansúgirov qıylysyndaǵy kólik jolaıryǵynyń qurylysy 2025 jyldyń maýsym aıynda aıaqtalatynyn málimdegen bolatyn.

Eske salaıyq, bul jolaıryqtyń qurylysy 2017 jyly bastalǵan. Alaıda 259 jer ýchaskesin satyp alý qajettigine baılanysty joba uzaqqa sozyldy. Sońǵy ýchaske tek 2024 jyldyń mamyr aıynda ǵana bosatylǵan. Jolaıryq tolyq iske qosylǵannan keıin Jansúgirov kóshesimen ótetin kólik aǵyny 15%-ǵa, al Seıfýllın dańǵyly boıynsha 20%-ǵa artady dep kútiledi.