Almatyda «Sergek» elektrli samokat júrgizýshileriniń ereje buzý derekterin tirkeıtin bolady
ALMATY. KAZINFORM – Almatyda elektrsamokatty paıdalanýshylardyń jol qozǵalysy erejelerin buzý faktilerin anyqtaý úshin «Sergek» kameralaryn paıdalaný josparlanyp otyr.
Almaty qalasy Polıtsııa departamentiniń resmı ókili Saltanat Ázirbektiń aıtýynsha, zańnamanyń jańa talaptary kúshine engennen keıin elektrsamokattar tolyqqandy kólik quraly retinde tanyldy. Al olardy paıdalanýshylar men kıksherıng kompanııalary úshin tıisti mindetter belgilendi.
Qazirgi ýaqytta polıtsııa kıksherıng kompanııalarynyń derekterin polıtsııa bazalarymen jáne jol qaýipsizdigin qamtamasyz etý úshin paıdalanylatyn avtomattandyrylǵan júıelermen biriktirý baǵytynda jumys júrgizip jatyr.
— Daıyndyq kezeńinde qaladaǵy jol qaýipsizdigi men quqyqtyq tártipti qamtamasyz etý kezinde biz qoldanatyn avtomattandyrylǵan júıelermen, sonyń ishinde «Sergekpen» belsendi túrde jumys júrgizildi. «Sergek» keshenderi elektrsamokat júrgizýshileriniń quqyq buzýshylyqtardy anyqtaıtyn bolady, — dedi Saltanat Ázirbek.
Qazir elektrsamokat tizgindegen adamdardyń jol erejesin buzý derekterin tikeleı polıtsııa qyzmetkerleri anyqtap júr. Bul jumysqa patrýldik polıtsııa, ýchaskelik ınspektorlar, mobıldi elektrpatrýlder men samokatty patrýlder tartylǵan.
— Osy jyldyń basynan beri jol qozǵalysy erejelerin buzǵany úshin 18 myńnan astam elektrsamokatty paıdalanýshy jaýapqa tartyldy, — dep habarlady ol.
Eske salaıyq, Almatyda elektrsamokattardy ornalastyrýdyń biryńǵaı erejesi engizildi.
