Almatyda senimgerlik basqarýǵa berilgen neke saraıy qalaǵa qaıtarylady
ALMATY. KAZINFORM — Almatyda jyldar boıy ǵashyqtardyń ortalyǵy bolǵan neke saraıy áli de nashar kúıde tur.
Byltyr Almaty qalasynyń memlekettik aktıvter basqarmasy Abaı dańǵyly, 101A mekenjaıynda ornalasqan «Jas Otaý» neke saraıy «Jar JarAlmaty» JShS-ine senimgerlik basqarýǵa berilgenin habarlaǵan bolatyn.
Nysandy satyp alý quqyǵynsyz 10 jyl merzimge alǵan kompanııa 1 mlrd teńge ınvestıtsııa salýǵa mindetti bolǵan.
Onyń ishinde ǵımarattyń sáýlettik kelbetin saqtaı otyryp qasbetin jóndeý, onyń aınalasyn abattandyrý jumystary bar.
Alaıda talaı almatylyq juptyń baqyty bekemdelip, nekesi qıylǵan nysan qazir nashar kúıde tur.
Nysanǵa arnaıy barǵan Kazinform fototilshisi bul jaǵdaıǵa kóz jetkizdi.
Neke saraıynyń qasbetinde buzylǵan tustary kóp, al onyń aınalasy abattandyrylmaǵan.
Osyǵan oraı, agenttik tıisti vedomstvoǵa saýal joldady.
Oǵan jaýap bergen Almaty qalasy memlekettik aktıvter basqarma basshysynyń orynbasary Jantóre Aıtjanov nysannyń bolashaǵyn naqtylady.
— «Jar JarAlmaty» JShS senimgerlik basqarý shartynda kózdelgen mindettemelerdi belgilengen merzimderde oryndamaýyna baılanysty qazirgi ýaqytta kelisimshartty buzý rásimderi júrgizilip jatyr, — dedi ol.
Eske salaıyq, bul nysandy senimgerlik basqarýǵa alǵan kompanııanyń óz mindetterin oryndamaýy alǵash ret emes. 2016 jyly neke saraıy «Altyn dán Qazaqstan» kompanııasyna 20 jylǵa senimgerlik basqarýǵa berilgen. Alaıda artylǵan mindetterdiń tolyq oryndalmaýyna baılanysty kelisimshart sot sheshimimen buzyldy.
Buǵan deıin Almatyda kúnine 70 jup neke qııatynyn jazǵanbyz.
