Almatyda Saıran mańyndaǵy «qańyrap turǵan» ǵımarat buzylady
ALMATY. KAZINFORM — Almatyda Abaı dańǵyly boıynda, Saıran kóline jaqyn ornalasqan qurylysy aıaqtalmaǵan bıik ǵımaratty buzý jumystary bastaldy.
Áleýmettik jelide ǵımarattyń joǵarǵy qabattaryn bólshektep jatqan arnaıy tehnıkanyń sýreti tarady.
Qala turǵyndaryna tanys bul aıaqtalmaǵan ǵımarat ýaqyt óte kele qasbetindegi graffıtıleri arqyly ózindik art-obektige aınalǵan. Jer teliminiń aýmaǵy — 0,6747 gektar.
Ǵımarattyń qurylysyn 2006 jyly «Qýat korporatsııasy» AQ bastaǵan. Alaıda eki jyldan keıin qarjynyń bolmaýyna baılanysty jumystar 10-qabatqa jetkende toqtap qalǵan. Ǵımarattyń jalpy aýdany — 14 583 sharshy metr.
Qalalyq josparlaý jáne ýrbanıstıka basqarmasynyń buǵan deıin habarlaýynsha, 2022 jylǵy 17 tamyzdaǵy satyp alý-satý shartyna sáıkes, jer teliminiń qazirgi ıesi — jeke tulǵa. 2024 jylǵy sáýir aıynda menshik ıesine qoldanystaǵy aıaqtalmaǵan qurylysty mindetti túrde buza otyryp, qyzmet kórsetý nysandary bar ákimshilik ǵımaratty salý jáne paıdalaný úshin sáýlet-josparlaý tapsyrmasy berilgen.
Eske salaıyq, buǵan deıin Almatynyń Saıran kólindegi jańadan ornatylǵan kópirler bólshektelip, ýaqytsha alynyp tastalǵanyn habarlaǵan edik.