Almatyda Saıran kóline quıatyn ózenge las sý tógildi - ekologtar jaýap berdi
ALMATY. KAZINFORM – Almatyda Saıran kóliniń soltústigine qaraı Úlken Almaty ózeniniń arnasyna qaldyqqa uqsas qoıý qara tústi sý tógilgen.
Oqıǵanyń beınejazbasy jelilerde jarııalandy. Onda almatylyqtar qara tústi sýdyń qaıdan shyqqanyn ári quramynda ne bar ekenin tekserýdi talap etti.
Ekologııa jáne qorshaǵan orta basqarmasynyń ókilderi Áýezov aýdany ákimdigimen birlesip, Sanıtarııalyq-epıdemıologııalyq baqylaý departamentiniń jáne Bostandyq aýdandyq ákimshilik polıtsııa basqarmasynyń qyzmetkerleri atalǵan aýmaqta tekserý júrgizgenin habarlady.
Tekserý nátıjesinde anyqtalǵan sý aǵyny — jańbyr men qar sýyn, sondaı-aq baý-baqsha sýaratyn sýdy aǵyzýǵa arnalǵan sý qubyrynyń jáne aryq jelisiniń bir bóligi ekeni belgili boldy.
Sonymen qatar qorshaǵan ortanyń yqtımal lastanýyn boldyrmaý maqsatynda zerthanalyq zertteýler júrgizý úshin sý úlgileri alynǵan.
- Tekseris nátıjeleri boıynsha ekologııalyq zańnama talaptarynyń buzylǵany anyqtalǵan jaǵdaıda quzyretti organdar Qazaqstan Respýblıkasynyń qoldanystaǵy zańnamasy sheńberinde tıisti sharalar qabyldaıtyn bolady, – delingen ekologııa basqarmasynyń málimdemesinde.
Eske salaıyq, Almatyda ekologııalyq talaptardy buzǵan kásiporyndarǵa 34 mln teńgege jýyq aıyppul salyndy.
