Almatyda Saıyn kóshesiniń jalǵasy 8 jyldan keıin ashyldy
ALMATY. KAZINFORM – Saıyn kóshesin Rysqulov dańǵylynan Móńke bı kóshesine deıin uzartý jobasy boıynsha kólik qozǵalysy tehnıkalyq túrde ashyldy. Jańa ýchaskeniń uzyndyǵy – 3,2 shaqyrym.
Jobany júzege asyrý 2018 jyly bastalǵan edi. Jumystar jer telimderin satyp alý jumystarynyń aıaqtalýyna qaraı kezeń-kezeńimen júrgizildi. Sońǵy jer telimi 2025 jyly qazan aıynda bosatyldy.
Jol ınfraqurylymyn damytý basqarmasy ókilderiniń málimetinshe, 20 mamyrǵa josparlanǵan qozǵalysty ashý aýa raıynyń qolaısyzdyǵyna baılanysty keıinge shegerildi. Qolaısyz aýa raıy 110 kV elektr berý jelisin kóshirý jumystaryn kesheýildetken.
– Qazirgi ýaqytta jol boıynda asfaltbeton jabynynyń tómengi qabaty tóseldi. Negizgi qurylys-montaj jumystary aıaqtalǵannan keıin asfalttyń joǵarǵy qabaty tóseledi, - delingen ákimdiktiń baspasóz qyzmeti taratqan habarlamada.
Sonymen birge ýchaskede qosalqy joldardy, júrginshiler joldaryn, velosıped joldaryn salý jáne oǵan irgeles aýmaqtardy kórkeıtý jumystary jalǵasyp jatyr.
Jol qozǵalysy qaýipsizdigin qamtamasyz etý maqsatynda barlyq qurylys-montaj jumystary tolyq aıaqtalǵanǵa deıin bul ýchaskede jyldamdyq shegi 40 shaq/saǵ bolyp belgilendi.
Júrgizýshiler jol belgileriniń talaptaryn jáne jol qozǵalysy erejelerin qatań saqtaýǵa tıis.
Eske salaıyq, buǵan deıin Almatyda Saıyn kóshesin uzartý jumysy nege kesheýildep jatqany jóninde jazyp edik.
