Almatyda sáýir aıynda qurylysy bastalǵan BRT qansha paıyzǵa daıyn

ALMATY. KAZINFORM – Almatynyń eki kóshesinde BRT (Bus rapid transit) jelisiniń qurylysy júrip jatyr. Osy oraıda Kazinform agenttigi jobalardyń iske asyrylýy jaıly jaýapty vedomstvoǵa saýal joldady.

Raıymbek batyr dańǵylynda jyldam avtobýstarǵa arnalǵan joldyń qurylysy 22 sáýir kúni bastaldy. 

Qalalyq mobıldilik basqarmasynyń jaýabyna sáıkes, Raıymbek dańǵylynda 17 shaqyrym aýmaq qaıta qurylady. Qazirgi ýaqytta sýarýdyń avtomatty júıesin ornatý, trotýarlar men velojoldardy ornatý, irgeles aýmaqtardy abattandyrý jumystary júrgizilip jatyr.

– Jumystar 25 paıyzǵa oryndalǵan, - delingen basqarma jaýabynda. 

Sonymen qatar vedomstvo qurylys-montajdaý jumystary úsh ýchaskege bólingenin atap ótti:

– Pýshkın kóshesi – Seıfýllın dańǵyly;

– Seıfýllın dańǵyly – Ahrımenko kóshesi;

– Ahrımenko kóshesi – Altyn Orda kóshesi.

– Jol qurylys jumystary jer ýchaskelerin satyp alýyna baılanysty júrgizilip jatyr, - dep túsindirdi basqarmadan.

Jeltoqsan kóshesi

Atalǵan kóshede BRT jelisiniń qurylysy 26 sáýir kúni bastaldy. Kósheniń jalpy uzyndyǵy – 4,6 shaqyrym. 

– Jeltoqsan kóshesindegi istelgen jumystardyń kólemi – 75%. Qazirgi tańda jol belgilerin syzý, avtobýstarǵa arnalǵan arnaıy jolaqtardy bólý jáne baǵdarshamdardy ornatý jumystary júrgizilip jatyr, - dep habarlady basqarmadan.

Qurylys jumystaryn bıyl qarasha aıynyń sońyna deıin aıaqtaý josparlanyp otyr.

Eske salaıyq, buǵan deıin Almatyda BRT jelisiniń jalpy uzyndyǵy qansha bolatynyn jazǵanbyz.