Almatyda sarapshylar Konstıtýtsııalyq reformany qoldady
ALMATY. KAZINFORM – Dostyq úıinde Qazaqstannyń júrip jatqan konstıtýtsııalyq reformalardy, sondaı-aq ishki saıasattyń ózekti máseleleri men Almaty qalasynyń damýyn talqylaýǵa arnalǵan saraptamalyq kezdesý ótti.
Jıynǵa áleýmettaný jáne saıasattaný salasynyń mamandary, akademııalyq orta ókilderi, sondaı-aq qala ákiminiń orynbasary Abzal Núkenov qatysty.
Qatysýshylar qalanyń damýynyń negizgi baǵyttary, basqarýshylyq sheshimder qabyldaýda ǵylym men taldaýdyń róli, sondaı-aq saraptamalyq qaýymdastyq pen basqarý organdarynyń ózara is-qımyl múmkindikteri jóninde pikir almasty.
Negizgi nazar bilim berý men ǵylym máselelerine, jas zertteýshilerdi qoldaýǵa, qalalyq ınfraqurylymdy damytýǵa jáne qala múddesi úshin ǵylym men tájirıbeniń ózara baılanysyna aýdaryldy.
Talqy barysynda sarapshylar elde júrgizilip jatqan konstıtýtsııalyq reformany qoldaıtyndaryn jetkizdi.
Kezdesýge qatysýshylar Qazaqstan Respýblıkasynyń jańa Konstıtýtsııasy jobasynyń eldiń odan ári turaqty damýy úshin mańyzdylyǵyn atap ótti.
Jańa Negizgi zańnyń basty baǵdarlary retinde bilim men ǵylym, mádenıet pen ınnovatsııalar, sondaı-aq ádildik, zań men tártip qaǵıdattary jáne tabıǵatqa uqypty qaraý ataldy.
Kezdesý ózekti damý baǵyttary boıynsha odan ári saraptamalyq-taldamalyq súıemeldeý jáne birlesken jumys júrgizý týraly kelisimmen qorytylandy.