Almatyda sanıtarlyq talaptardy buzǵan bilim berý nysandary iri aıyppul tóledi
ALMATY. KAZINFORM – Almatynyń bas sanıtarlyq dárigeri Qasymhan Alpysbaıuly bilim berý nysandaryndaǵy sanıtarııalyq-epıdemıologııalyq baqylaýdyń 2025 jylǵy nátıjesi týraly aıtty.
Onyń aıtýynsha, Almaty qalasynyń sanıtarııalyq-epıdemıologııalyq baqylaý departamentiniń baqylaýynda 2 746 bilim berý obektisi bar. Onyń ishinde: 361 jalpy bilim beretin mektep, balalar men jasóspirimder turatyn 32 obekt, mektepterdiń 274 as blogy, 1 026 mektepke deıingi uıym, 7 mektep-balabaqsha, joǵarǵy oqý oryndarynyń (239) jáne orta oqý oryndarynyń (150) obektileri, 3 qala syrtyndaǵy lager, 5 balalar shıpajaıy, 51 medıtsınalyq-áleýmettik jáne 598 ózge de obektiler.
– 2025 jyly barlyǵy 115 obekt tekserildi. Anyqtalǵan buzýshylyqtar boıynsha 51 ákimshilik quqyqbuzýshylyq týraly hattama jasalyp, jalpy somasy 19 226 480 teńge aıyppul salyndy. Jospardan tys tekserýlerdiń nátıjeleri boıynsha 4 materıal (3 balabaqsha jáne 1 balalar úıi) Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaraýyna jiberildi. 17 jedel den qoıý sharalary qoldanyldy, onyń ishinde: jekelegen qyzmet túrlerin toqtata turý – 2, tyıym salý – 15, ónimdi keri qaıtarý – 1, jumystan ýaqytsha shettetý – 2, - dedi ol.
Sonymen qatar Qasymhan Alpysbaıuly mıkrobıologııalyq zertteý úshin 40 aýyz sý synamasy alynyp, barlyǵy normatıvtik qujattardyń talaptaryna sáıkes bolǵanyn atap ótti.
– Jaryqtandyrý deńgeıi boıynsha 2 803 ólsheý júrgizilip, onyń 577-si (20,5%) talaptarǵa sáıkes emes ekeni anyqtaldy. Sáıkessizdik anyqtalǵan zertteýler men ólshemderge qatysty jaýapty tulǵalar Qazaqstan Respýblıkasynyń Ákimshilik quqyq buzýshylyq týraly Kodekstiń 425-baby 1-bóligi boıynsha ákimshilik jaýapkershilikke tartylyp, buzýshylyqtardy joıý týraly nusqamalar berildi. Barlyq buzýshylyqtar joıyldy, - dedi Qasymhan Alpysbaıuly.
Eske salaıyq, Almatyda JRVI jáne tumaýmen aýyrǵandar sany azaıdy.