Almatyda samokat pen mopedterdiń qozǵalysyna baqylaý kúsheıtildi

ALMATY. KAZINFORM — Almatylyq polıtseıler kóktem, jaz mezgilderinde qalanyń joldarynda apattyq jaǵdaı týdyratyn jekelegen kólik túrlerin baqylaýǵa kóshti.

«Tájirıbede mototsıklder men mopedterdiń ıeleri tikeleı aǵyndy qondyrǵylardy paıdalaný deregi kóp kezdesedi. Bul ásirese túngi ýaqytta azamattardyń tynyshtyǵyna áser etedi jáne olar ruqsat etilmegen jarystardy, sondaı-aq manevr jasaý jáne jyldamdyqty shekteý erejelerin óreskel buza otyryp, uıymdaspaǵan toptyq qozǵalystardy uıymdastyrady. Bul qala turǵyndary men basqa da jol qozǵalysyna qatysýshylardyń shaǵymdaryn týdyrady. Osyǵan baılanysty Almaty polıtsııasy balamaly kólik túrlerin júrgizetin adamdardyń quqyq buzýshylyqtaryn anyqtaý jumystaryn kúsheıtti. Qazir reıdter júrgizilip jatyr», — dedi Almaty qalalyq polıtsııa departamentiniń jergilikti polıtsııa qyzmeti basqarmasy bastyǵynyń mindetin atqarýshy Serik Shýmaev.

Onyń málimetinshe, reıd barysynda qala joldarynda 168 quqyq buzýshylyqty anyqtalyp, 13 mas júrgizýshi ustaldy. Sonymen qatar, 68 moped jáne 23 samokat júrgizýshisi ákimshilik jaýapqa tartyldy, 38 moped aıyppul turaǵyna qoıyldy.

«Motokólikterdiń qatysýymen bolatyn jol apattarynyń negizgi sebepteri — belgilengen jyldamdyqty saqtamaý, qarsy betke shyǵyp ketý, kóshe qıylystary men manevr jasaý erejelerin buzý jáne t. b. Ótken jyly mopedterdiń qatysýymen 554 jol apaty bolyp, 541 adam jaraqat alyp, 16 adam qaza tapqan», — dedi Serik Shýmaev.

Sondaı-aq, ótken jyly Almatyda samokat pen mopedter 617 jol apatyna sebepker bolǵan.