Almatyda samokat tizgindegen jigit kólik júrgizýshisine burysh spreıin shashty

ALMATY. KAZINFORM — Almatyda kólik júrgizýshisi men samokat tizgindegen er adamnyń arasynda janjal týdy. 

Áleýmettik jelilerde kólik júrgizýshisi men elektrosamokat mingen er adamnyń arasyndaǵy janjaldyń beınejazbasy tarap ketti.

Aldyn ala boljam boıynsha kelispeýshilik kóliktiń burylý kezinde bolǵan. Kadrlarda samokattaǵy adamnyń oqıǵa ornynan keter aldynda qaltasynan burysh spreıin shyǵaryp, ony júrgizýshige shashyp jatqanyn kórýge bolady.

Almaty Polıtsııa departamenti baspasóz qyzmetiniń habarlaýynsha, Bostandyq aýdandyq polıtsııa bóliminiń qyzmetkerleri oqıǵaǵa qatysýshylardy anyqtady. Qazirgi ýaqytta tergeý amaldary júrgizilip jatyr. Onyń qorytyndysy boıynsha eki taraptyń da áreketine zańdy túrde baǵa berilip, tıisti sharalar qabyldanatyn bolady.

— Jolda kez kelgen agressııaǵa nemese qoǵamdyq tártipti buzýǵa jol berilmeıdi. Túsinispeýshilikter tek zań sheńberinde, arandatýsyz jáne kúsh qoldanbaı sheshilýi kerek. Almaty polıtsııasy kólik júrgizýshilerin, avtokólikterden bastap samokat aıdaýshylarǵa deıin ózara syılastyq pen jol qozǵalysy erejelerin saqtaýǵa shaqyrady, — dep atap ótti Bostandyq polıtsııa bóliminiń bastyǵy Dıdar Ahanov.

Aıta keteıik, buǵan deıin elimizde samokat tizgindegenderge qosymsha shekteý ázirlenetini týraly jazǵan bolatynbyz.