Almatyda samokat mingen eki qyzdy avtobýs qaǵyp ketti

ALMATY. KAZINFORM - Almatyda elektrosamokat minip, jaıaý júrginshilerge arnalǵan joldan ótip bara jatqan eki qyzdy avtobýs qaǵyp ketken vıdeo áleýmettik jelide jarııalandy.

Jol apaty 3 qyrkúıekte Almaly aýdanynda bolǵan. Buǵan deıin Polıtsııa departamenti Maqataev kóshesimen shyǵys baǵytta kele jatqan avtobýs júrgizýshisi Ýálıhanov kóshesimen soltústikke qaraı jaıaý júrginshiler ótkeli arqyly ótip bara jatqan eki qyzdy qaǵyp ketkeni habarlanǵan bolatyn.

Apat saldarynan 2008 jyly týǵan eki qyz jaraqat alyp, medıtsınalyq mekemege jetkizildi.

Almaty qalalyq Balalarǵa arnalǵan shuǵyl medıtsınalyq kómek ortalyǵy dırektorynyń orynbasary Qurmet Toqtardyń aıtýynsha, 5 qyrkúıektegi jaǵdaı boıynsha zardap shekken jasóspirimderdiń densaýlyǵy ortasha aýyrlyq dárejesinde baǵalanady.

Olarǵa Densaýlyq saqtaý mınıstrliginiń dıagnostıka jáne emdeý hattamalaryna sáıkes medıtsınalyq kómektiń tolyq kólemi kórsetiledi.

Eske sala keteıik, Almatyda elektrovelosıpedterdiń sany kúrt ósip, olardy tirkeý máselesi ózekti bolyp otyr. Polıtsııa qýaty joǵary kólikterdiń zań boıynsha moped sanatyna kiretinin eske salyp, tirkeý tek talap emes, ıesiniń quqyǵyn qorǵaý kepili ekenin aıtty.

Almatyda polıtsııa 70-ke jýyq samokatty aıyppul turaǵyna qoıdy.

Samokat tizgindegenderdiń áreketi úshin kıksherıng kompanııalar jazalanýy múmkin.