Almatyda samokat aıdaǵan jasóspirimder náreste arbasyn qaǵyp ketti
ALMATY. KAZINFORM – Almatynyń «Orbıta» yqshamaýdanynda 31 tamyz kúni samokat aıdaǵan eki jasóspirim joǵary jyldamdyqpen kele jatyp, náreste otyrǵan arbany soqqan.
Abyroı bolǵanda, sábı jaraqat almaǵan. Oqıǵanyń vıdeosy áleýmettik jelide tarady.
Balanyń ákesiniń sózinshe, oqıǵa ornynan qashpaq bolǵan jasóspirimderdi turǵyndar ustap, polıtsııaǵa tapsyrǵan.
Almaty Polıtsııa departamentiniń baspasóz qyzmeti Kazinform tilshisine bul oqıǵaǵa qatysty túsinik berdi.
Vedomstvonyń málimetinshe, eki jasóspirimge jeke mobıldi qurylǵylardy paıdalaný erejesin buzǵany úshin ákimshilik jaýapkershilik júktelgen. Sondaı-aq, olardyń ata-analaryna balalardy tárbıeleý mindetin tıisinshe oryndamaǵany úshin shara qoldanyldy.
– Jasóspirimdermen jáne olardyń ata-analarymen profılaktıkalyq áńgime júrgizildi. Mundaı quqyqbuzýshylyqtarǵa jol berilmeıtini túsindirildi, - dep habarlady qalalyq polıtsııa departamenti.
Vedomstvo quqyqtyq tártipti buzý derekteriniń nazardan tys qalmaıtynyn jáne qaıtalanbaýy úshin ákimshilik sharalar mindetti túrde qoldanylatynyn atap ótti.
Aıta keteıik, Almaty keıingi ýaqytta elektr samokatty paıdalaný kezinde zańbuzýshylyqtar jıilegen. Polıtsııa buǵan deıin bul kólik túrin basqarý erekshe jaýapkershilik pen muqııattylyqty talap etetinin eskertip, úndeý jasaǵan edi.
Sondaı-aq Іshki ister mınıstrligi samokatty jalǵa beretin kompanııalardyń jaýapkershiligin qatańdatatynyn da jazǵanbyz.