Almatyda salmonellezben syrqattaný 2 ese ósti

ALMATY. KAZINFORM – Almatyda birinshi jartyjyldyqta salmonellezben aýyrǵan 32 jaǵdaı tirkelse, onyń 8-i baladan anyqtalǵan.

Qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqovanyń aıtýynsha, 100 myń turǵynǵa shaqqandaǵy salmonellezben aýyrý kórsetkishi ótken jyldyń sáıkes kezeńimen salystyrǵanda 2 ese ósti.

«Salmonellezben aýyrǵandardyń jalpy sanynan 14 jasqa deıingi balalardyń úlesi 25,0 paıyz. Belgili bolǵanyndaı, naýqastardyń basym bóligi úı jaǵdaıynda daıyndalǵan sapasyz ónimderin tutynǵan, ázirleý tehnologııasy men saqtaý sharttary buzylǵan, jeke bas gıgıenasyn saqtamaǵan. Biren-saran jaǵdaıda qoǵamdyq tamaqtaný oryndarynda tamaq ishkenen aýyrǵan», - dedi ol.

Sanıtarlyq epıdemıolog qoǵamdyq oryndarda azyq-túlik ónimderin, onyń ishinde jemis-jıdek pen kókónisti satyp alǵanda, onyń quramy men jasalý merzimine, syrtqy túrine erekshe nazar aýdarý kerektigin eske salady.

Salmonellez – temperatýranyń kóterilýimen, ish bóligindegi qatty aýrý sezimniń bolýymen, qusýmen jáne ish ótýmen sıpattalatyn jedel juqpaly aýrý.