Almatyda salynǵan baqsha úıiniń qurylysy zańsyz dep tanyldy
ALMATY. KAZINFORM — Joǵarǵy sot Almatyda zańsyz salynǵan nysandy súrý týraly is boıynsha sheshim shyǵardy.
Daýdyń mánisi jaýapkerlerge tıesili jer teliminde bekitilgen jobaǵa sáıkes kelmeıtin baqsha úıi salynǵan. Buǵan deıin sot sheshimimen bul ýchaskede zańsyz salynǵan ǵımarattardy buzýǵa qaýly shyǵarylǵan bolatyn.
Osyǵan qaramastan jaýapkerler sot aktisin oryndaýdan jaltarý maqsatynda birqatar satyp alý-satý mámilelerin jasap, qurylysty jalǵastyrǵan.
— Jergilikti sottar ýákiletti organnyń nysandy salý kezinde (buzýmen) menshik ıesiniń zańdylyqty saqtaýyna tekserý júrgizbegenin jáne buryn salynǵan ǵımarattyń buzylmaǵany dáleldenbegenin alǵa tartyp, KMM-niń talap qoıýyn qanaǵattandyrýdan bas tartqan. Іs kassatsııalyq tártipte qaralyp, KMM-niń talap qoıýyn qanaǵattandyrý týraly jańa sheshim shyǵaryldy. Joǵarǵy sot salynǵan nysannyń derbes qurylysqa ruqsat etilgen ólshemderden aıtarlyqtaı asyp ketkenin jáne kelisilgen jobaǵa sáıkes kelmeıtinin anyqtady, — delingen Joǵarǵy sot habarlamasynda.
3 qabattan turatyn turǵyn úı ǵımaraty belgilengen tártippen bekitilgen qujattamadan aýytqyp ketken. Aıaqtalǵan qurylys obektilerin qabyldaýdyń jáne paıdalanýǵa berýdiń zańmen belgilengen tártibi buzylyp salynǵan.
Zańsyz salynǵan ǵımaratty buzý týraly sot aktisin oryndaýdan jaltarý maqsatynda jasalǵan baqsha úıin satý-satyp alý sharttary jaramsyz dep tanyldy.