Almatyda Saın kóshesiniń jańa bóligi nelikten qoldanysqa berilmedi - ákim jaýaby

ALMATY. KAZINFORM - Almaty ákimi Erbolat Dosaev Alataý aýdanynyń turǵyndarymen kezdesti.

«Ójet» shaǵyn aýdanynyń turǵyny Tilendıev kóshesin uzartý jumystary qashan bastalatynyn surady.

- Jol salynady, úıler buzylady dep jatyrmyz. Qaı kezde bul jumystar bastalady. «Qashan ketemiz» dep qashanǵy otyramyz, - dedi turǵyn.

Almaty ákimi memleket qajettiligine jerdi satyp alý tártibin túsindirdi.

- Jalǵyz Tilendıev emes, basqa kóshelerde de uzartý jumystary júrip jatyr. Biraq munda uzartýdy bastaý úshin eń bastysy jerdi satyp alýymyz kerek. Eń qıyn másele osy. Turǵyndarmen kelisimshart jasasyp, aqsha tólengennen keıin jumystar bastalady. Mysaly, Saın kóshesinde turyp qalǵanymyz, 1 úı qalyp qaldy. Sonyń qasynda júrmiz, sottastyq. Zań boıynsha ony buza almaımyz. Biraq osy jyly bitiremiz degen senimimiz bar, - dedi Erbolat Dosaev.

Eske salaıyq, buǵan deıin Almatyda 2025 jyly Abaı jáne Saın kóshelerin uzartý jumystary tolyq aıaqtalatynyn jazǵanbyz.