Almatyda Saın kóshesine qatysty ilki joba aıaqtaldy: sheshim qandaı

Jol qozǵalysyn uıymdastyrý jáne jolaýshylar kóligi basqarmasynyń málimetinshe, joba qorytyndysy qoǵamdyq kólikke basymdyq berýdiń tıimdi ekenin kórsetti. Sondaı-aq arnaıy jolaqtardy aldaǵy ýaqytta biryńǵaı keshendi shema aıasynda damytý formaty aıqyndaldy.

- Monıtorıng nátıjesi arnaıy jolaq engizilgennen keıin qoǵamdyq kólik jumysynyń negizgi kórsetkishterinde oń ózgeris bolǵanyn kórsetti. Ásirese, qarbalas ýaqytta aıqyn nátıje baıqaldy. Tańǵy qarbalas ýaqytta qoǵamdyq kóliktiń qozǵalys jyldamdyǵy 26,2 km/saǵattan 31,8 km/saǵatqa deıin artty. Keshki qarbalas ýaqytta ortasha jyldamdyq 25 km/saǵattan 30,4 km/saǵatqa deıin ósti, - dep habarlady vedomstvodan.

Sonymen qatar basqarma tarapynan qoǵamdyq kólik qozǵalysynyń turaqtylyǵy jaqsarǵany atap ótildi. Máselen, bir kún ishindegi ortasha qozǵalys aralyǵy 13,6 mınýttan 12 mınýtqa deıin, ıaǵnı shamamen 12%-ǵa qysqarǵan. Al tańǵy qarbalas ýaqytta avtobýstar arasyndaǵy aralyq 13,6 mınýttan 11,6 mınýtqa deıin nemese 14,7%-ǵa azaıypty.

Odan bólek jolaýshylar sanynda da oń dınamıka baıqalǵan. Bir táýliktegi jolaýshylar sany 42 396-dan 44 515,8-ge deıin, ıaǵnı 5%-ǵa artqan.

- Osylaısha, pılottyq jobanyń nátıjesi arnaıy jolaqtardyń qoǵamdyq kóliktiń qozǵalys jyldamdyǵy men turaqtylyǵyn, ásirese qarbalas ýaqytta arttyrýdyń tıimdi quraly ekenin rastady. Sonymen birge pılottyq joba arnaıy jolaqtardy jeke-jeke ýchaske retinde emes, qalanyń negizgi magıstraldarynda qoǵamdyq kólikke basymdyq beretin ózara baılanysty birtutas júıe retinde damytý qajettigin kórsetti, - deıdi basqarma ókilderi.

Pılottyq joba nátıjesi boıynsha qala ákimdigi ál-Farabı dańǵyly – Saın kóshesi – Rysqulov dańǵyly – Shyǵys aınalma joly baǵyttaryn qamtıtyn aınalma marshrýttyń keshendi shemasyn ázirlemek. Demek, atalǵan kóshelerdiń barlyǵynda qoǵamdyq kólikke arnalǵan jolaq bolady. Biraq oǵan deıin, 2026 jyldyń 31 tamyzynan bastap Saın kóshesindegi arnaıy jolaq alynyp tastalady.

- Bul pılottyq formattan kelesi kezeńge, ıaǵnı jol jelisiniń basqa ýchaskelerin jáne keshendi shemany iske asyrýǵa qajetti normatıvtik talaptardy daıyndaý úshin qajet. Qajetti normatıvtik sheshimder qabyldanyp, tıisti ınfraqurylym daıyndalǵannan keıin Saın kóshesindegi arnaıy jolaq qalanyń negizgi magıstraldarynda engiziledi, - dep túsindirdi vedomstvodan.

Eske salaıyq, bıyl 20 maýsymnan bastap Saın kóshesiniń Rysqulov dańǵylynan Mustafın kóshesine deıingi bóliginde pılottyq rejımde qoǵamdyq kóliktiń arnaıy jolaǵy jumys iske qosyldy. Qoǵamdyq kólik joly kóshede sary túspen bólindi.

Keıin turǵyndar shaǵymynan keıin Saın kóshesiniń avtobýs jolaǵyna ózgeris engizildi.

Al tamyz aıynda Saın kóshesiniń bóligindegi jyldamdyq rejımi ózgerdi.