Almatyda Saın kóshesin uzartý jumysy nege kesheýildep jatyr
ALMATY. KAZINFORM — Almatyda Saın kóshesin uzartý jumystary osy jyldyń ekinshi jartysynda aıaqtalmaq.
Saın kóshesin Rysqulov dańǵylynan Móńke bı kóshesine deıin 3,2 shaqyrymǵa uzartý jumystary 2019 jyly bastaldy.
Alaıda jekemenshiktegi jer ýchaskelerin memleket muqtajyna alý jumysynyń baıaý júrýine baılanysty jobanyń tolyq júzege asýy 2023 jylǵa, keıin 2024 jáne 2025 jylǵa shegerildi.
Alaıda byltyr almatylyqtar kópten kútken kóshe bóligi qaıtadan qoldanysqa berilmedi. Sebebi sońǵy jer ýchaskesi 2025 jyldyń qazanynda bosatylǵan.
Jalpy kósheniń bul aýmaǵyn uzartý úshin 66 jer telimi satyp alyndy.
Kazinform agenttiginiń saýalyna jaýap bergen Almaty qalasy jol ınfraqurylymyn damytý basqarmasy kóshe ashylýy boıynsha merzimdi naqtylady.
Vedomstvo málimetinshe, qurylys-montaj jumystarynyń aıaqtalý 2026 jyldyń qyrkúıekke josparlanǵan.
Qazir joba 70%-ǵa oryndalǵan. 3,2 shaqyrymdyq joldyń 1,8 kılometrinde asfaltbeton jabyny tóselgen.
— Jumys qarqyny 110 kV elektr berý jelilerin qaıta ornalastyrý qajettiligine baılanysty tehnologııalyq shekteýlermen tejelip otyr. Onyń ishinde jylý berý maýsymynda qoldanystaǵy 110 kV jelilerin ajyratýdyń múmkin emestigi bar. Atalǵan shekteýler jertóseminiń negizin salý, jol jamylǵysyn tóseý, sondaı-aq 5 jerústi jaıaýjúrginshi ótkelin salý jumystaryna áser etedi, — dep habarlady basqarmadan.
Saın kóshesiniń uzarytylatyn bóligine Kazinform fototilshisi baryp, joldyń qazir jaı-kúıin kórip qaıtty.
Baıqaǵanymyzdaı, bul aýmaqta qazir ártúrli tehnıka turǵanymen, naqty jumystar istelip jatqan joq.
Aýmaqta buzylǵan qurylystardyń bólikteri men qoqys kóp. Kóshe tolyq aıaqtalmasa da, munda júretin kólikter az emes.
Móńke bı jaǵynan asfalt tóselgen bólikten keıin júrgizýshiler biraıaq joldarmen Rysqulov kóshesine amaldap shyǵyp júr.
Eske salaıyq, buǵan deıin Almaty kóshesinde jańadan salynǵan trotýar opyrylyp qalǵanyn jazǵanbyz.
