Almatyda Rysqulov dańǵylynan Buqtyrma kóshesine deıin alty jolaqty jańa magıstral salynady
ASTANA. KAZINFORM — Almatyda «Shyǵys qaqpasy» polıortalyǵyn damytý aıasynda qalanyń soltústik-shyǵys bóliginde jańa joldar men ınjenerlik kommýnıkatsııalar salý josparlanǵan. Joba 2023 jyly bekitilgen Almaty qalasynyń Bas josparyna sáıkes júzege asyrylyp jatyr. Qazirgi ýaqytta Bas josparǵa engizilip jatqan túzetýler bul jobaǵa qatysty qandaı da bir ózgeristerdi kózdemeıdi.
Aýmaqtardyń kólik baılanysyn jaqsartý maqsatynda Baımaǵambetov kóshesi, Qulja tas joly, Buqtyrma kóshesi jáne Rysqulov dańǵyly shekteıtin aýmaqta jalpy uzyndyǵy 17,5 shaqyrym bolatyn jańa joldar salý josparlanyp otyr.
— Buqtyrma kóshesi men Rysqulov dańǵylyn jalǵaıtyn jańa magıstral alty jolaqty bolady. Onyń eni — 50 metr, uzyndyǵy — 4,6 shaqyrym. Bul joldy salý Úlken Almaty aınalma avtomobıl jolymen (ÚAAAJ) kólik baılanysyn qamtamasyz etýge múmkindik beredi. Nátıjesinde kólik qoljetimdiligi artyp, qalanyń kóshe-jol jelisiniń ózara baılanysy jaqsarady, sondaı-aq Almaty men aglomeratsııadaǵy eldi mekender arasyndaǵy kólik qatynasynyń tıimdiligi kúsheıedi, — delingen habarlamada.
Ákimdiktiń habarlaýynsha, josparlanǵan magıstral jeke turǵyn úı sektory arqyly ótetindikten, memlekettik qajettilik úshin shamamen 200 jer ýchaskesin májbúrlep satyp alý kózdelgen. Osyǵan baılanysty qala ákimdigi tıisti qaýly qabyldap, jyljymaıtyn múlik ıelerine habarlama joldandy.
Qala ákimdiginiń málimetinshe, polıortalyqtar júıesin damytý Almatynyń negizgi damý basymdyqtarynyń biri bolyp qala beredi. Jańa polıortalyqtarda qoǵamdyq-iskerlik jáne turǵyn úı klasterlerin qalyptastyrý, kólik-logıstıkalyq toraptardy damytý, qoǵamdyq keńistikter men áleýmettik nysandar salý kózdelgen.
Sonymen qatar qalanyń aýmaqtyq damý múmkindiginiń shekteýli ekenin eskere otyryp, megapolısti damytýdyń basym baǵyty retinde jeke turǵyn úı sektoryn kezeń-kezeńimen qaıta jańǵyrtý jáne damytý qarastyrylǵan. Bul álemniń iri qalalarynda qalyptasqan tájirıbege tolyq sáıkes keledi.
Eske salaıyq, buǵan deıin Almaty ákimdigi saıabaq daýy boıynsha turǵyndardyń talabyna jaýap bergen edi.
