Almatyda І Respýblıkalyq jastar teatrlary festıvali bastaldy
Almatyda 1-6 qarasha kúnderi І Respýblıkalyq jastar teatrlary festıvali ótedi, dep habarlaıdy Kazinform.
Festıvaldiń saltanatty ashylýy Ǵ.Músirepov atyndaǵy Qazaq memlekettik akademııalyq balalar men jasóspirimder teatrynda ótti. Shara barysynda elimizde úzdik dep tanylǵan qoıylym rejısserleri marapattaldy.
Atap aıtqanda, Gúlnaz Balpeıisova, Meıram Habıbýllın, Anton Zaıtsev, Álibek Ómirbekuly, Shaǵýan Úmbetqalıev, Anna Tsoı, Árıdash Ospanbaeva jáne Shyńǵys Jaqypbaı syndy 35 jasqa deıingi jas rejısserler arnaıy dıplom jáne 1 mln teńge kólemindegi sertıfıkattarmen marapattaldy.
Aıtý kerek, úzdikter qatarynan tabylǵan otandyq jas rejısserlerdiń qoıylymdary 2-6 qarasha aralyǵynda megapolıstiń teatrlarynda sahnalanatyn bolady. Bul rette Astana qalasy ákimdiginiń Jastar teatry, M.Áýezov atyndaǵy Qazaq ulttyq drama teatry, S.Seıfýllın atyndaǵy Qaraǵandy oblystyq akademııalyq drama teatry jáne taǵy basqa óner ujymdary úzdik qoıylymdaryn usynbaqshy.
Festıvaldi uıymdastyrýshylardyń sózinshe, festıval teatr álemindegi jas rejısserlerdiń jetistikterin nasıhattap, olardyń kásibı áleýetin arttyrý maqsatynda ótedi.
