Almatyda Respýblıka kúnine oraı tórt jańa mektep ashyldy
ALMATY. KAZINFORM - Almatyda Respýblıka kúni qarsańynda 8 myń oqýshyǵa arnalǵan jańa mektepter ashyldy.
Almaty ákimdiginiń habarlaýynsha, bıyl megapolıs tarıhynda alǵash ret bir oqý jylynda 24 jańa mektep ashylady.
Almatyda Respýblıka kúnine oraı birden tórt zamanaýı jalpy bilim beretin mektep saltanatty túrde ashyldy. Solardyń biri – Medeý aýdanynda ornalasqan, jobalyq qýaty 2 myń oqýshyǵa arnalǵan №220 jalpy bilim beretin mektep.
-Bul jalpy bilim beretin mektep osy aımaqtaǵy oryn tapshylyǵyn tolyq jabady. Jalpy, 1 qyrkúıekten beri qalada 12 jańa mektep ashyldy. Respýblıka kúnine oraı osy aptada taǵy tórt bilim berý mekemesi paıdalanýǵa beriledi. Besinshi mektep – qarasha aıynda, al taǵy segizi – jyl sońyna deıin «satyp alý» tetigi arqyly iske qosylady, – dedi Almaty qalasy ákiminiń orynbasary Azamat Qaldybekov.
Onyń aıtýynsha, megapolıste bıylǵy oqý jylynda barlyǵy 24 mektep ashylady, sonyń ishinde 21 mektep «Keleshek mektepteri» ulttyq jobasy aıasynda salynyp jatyr.
-Bul tarıhı maksımým. Buǵan deıin bir oqý jylynda munshama jańa mektep paıdalanýǵa berilmegen. Munyń barlyǵy Qazaqstan Prezıdenti Qasym-Jomart Toqaev bastamashy bolǵan «Keleshek mektepteri» ulttyq jobasynyń arqasynda júzege asty, – dedi Azamat Qaldybekov.
№220 mektep zamanaýı úlgide salynǵan, onyń quramynda 83 oqý kabıneti, 4 sport zaly, sondaı-aq ashana, kitaphana, medıtsınalyq pýnkt, konferentsııa zaly, sport alańy, tennıs korty, voleıbol jáne basketbol alańdary bar.
-Ǵımarat qozǵalysy shekteýli adamdar úshin tolyq beıimdelgen. Barlyq kabınet ınteraktıvti taqtalarmen jáne oqý materıaldarymen jabdyqtalǵan. Oqýshylardyń qaýipsizdigin qamtamasyz etý úshin beınebaqylaý júıeleri men dabyl batyrmalary ornatylǵan, – dedi mektep dırektory Manat Áshirbekova.
Aıta ketý kerek, Respýblıka kúnine oraı Almatyda Naýryzbaı aýdanyndaǵy Quramys shaǵynaýdanynda ornalasqan №219 jalpy bilim beretin mektep te esigin aıqara ashady. Bilim ordasynda 1 500 oqýshyǵa arnalǵan 79 oqý kabıneti bar. Bıyl 1-synypqa 80 oqýshy qabyldandy. Oqý-tárbıe úderisin 26 pedagog júrgizedi.
Sondaı-aq Naýryzbaı aýdanynyń Shuǵyla shaǵynaýdanynda ornalasqan №221 jalpy bilim beretin mektep jumysyn bastaıdy. Bilim ordasynda 2 500 oqýshy ornyn qamtıtyn 125 oqý kabıneti bar. Búginde 1 722 oqýshy qabyldanǵan. Oqý-tárbıe úderisin joǵary kásibı deńgeıge ıe 74 pedagog qamtamasyz etedi.
Budan bólek, Alataý aýdanynda ornalasqan №222 jalpy bilim beretin mektep te ashylady. Bilim ordasynda 2 myń oqýshy ornyn qamtıtyn 96 oqý kabıneti bar. Búginde 700 oqýshy qabyldandy. 1-synypqa 41 bala qabyldanǵan. Bilim berý úderisin 44 pedagog júrgizedi.
Barlyq jańa mektep zamanaýı jabdyqtarmen, keń synyptarmen, sport jáne shyǵarmashylyq zaldarmen, sondaı-aq eńbek kabınetterimen qamtamasyz etilgen. Bilim berý uıymdary osy oqý jylynyń ekinshi toqsanynan bastap oqýshylardy qabyldaýǵa tolyq daıyn.
Almaty qalasynyń damýy aıasynda jergilikti bıýdjet esebinen 550 oryndyq taǵy bir mekteptiń qurylysy júrgizilip jatyr, sondaı-aq Alataý aýdanynda 900 oryndyq «Abyróı» jeke mektebin jáne Naýryzbaı aýdanynda 1 200 oryndyq jańa jeke mektepti satyp alý josparlanyp otyr.