Almatyda Respýblıka kúnine oraı Memlekettik tý kóterildi
ALMATY. KAZINFORM — «Medeý» muz aıdynynda Memlekettik týdy kóterý rásimi ótti. Іs-sharaǵa Almaty qalasynyń ákimi Erbolat Dosaev, qoǵam qaıratkerleri, máslıhat depýtattary, úkimettik emes jáne jastar uıymdarynyń ókilderi, sondaı-aq qala turǵyndary qatysty.
Týdy kóterý rásimi dástúr boıynsha áskerı orkestrdiń súıemeldeýimen memlekettik ánurandy oryndaýmen bastaldy. Memlekettik týdyń kólemi 98 sharshy metr bolsa, bıiktigi 40 metr.
Eske salaıyq, búgin Almatyda merekege oraı drondar shoýy ótedi: saǵat 21:00–de Abaı alańynda, al 21:30–da «Astana» alańynda 500-den astam dron sınhrondy túrde kókke kóterilip, ulttyq mádenıet elementteri men el tarıhyndaǵy mańyzdy sátterdi beıneleıtin 3D beıneler jasaıdy.
Oǵan qosa, saǵat 20:00–de Respýblıka kúnine oraı «Kóktóbe» telemunarasynda merekelik sáýlettik jaryqtandyrý qosylady.
Buǵan deıin Qasym-Jomart Toqaev ulyq mereke — Respýblıka kúnine arnalǵan Memlekettik tý kóterý saltanatty rásimine qatysqanyn jazǵanbyz. Іs-shara «Aqorda» rezıdentsııasynyń aldynda ótti.
