Almatyda Respýblıka alańyndaǵy sýburqaq qashan ashylady
ALMATY. KAZINFORM – Almatydaǵy Respýblıka alańyndaǵy sýburqaq keshenin jańartý jumystary shamamen 60 paıyzǵa oryndaldy.
Qalanyń qoǵamdyq keńistikterin damytý basqarmasynyń málimetinshe, búginge deıin sýburqaq tostaǵany men tehnıkalyq bólmelerde betondaý jumystary tolyq aıaqtalǵan. Qazirgi ýaqytta qubyrlar ornatylyp jatyr, sondaı-aq gıdrooqshaýlaý jumystary bastalǵan.
— Qaıta qurý barysynda sapa talaptaryna saı, uzaq ýaqyt paıdalanýǵa arnalǵan zamanaýı qaptaý materıaldary qoldanylyp jatyr, - dep habarlady vedomstvo ókilderi Kazinform.kz resmı saýalyna bergen jaýabynda.
Jobanyń merdigeri – «Ec Energy Qazakhstan» JShS. Nysandy qazan aıynda paıdalanýǵa berý josparlanǵan.
Kelisimshart boıynsha sýburqaqty qaıta qurýǵa 2,48 mlrd teńge bólingen.
Eske salaıyq, buǵan deıin Almatyda 15 jylda alǵash ret birden tórt iri sýburqaq kesheni jóndelip jatqanyn habarlanǵan edik.
Olardyń qatarynda: ákimdik ǵımaraty aldyndaǵy Shyǵys jáne Batys, Respýblıka alańyndaǵy jáne Ǵ. Músirepov atyndaǵy teatr janyndaǵy sýburqaqtar bar. Jobaǵa jalpy 5,6 mlrd teńge jumsalmaq.
Qazir qalada shamamen 150 sýburqaq bar. Onyń ishinde 66-sy kommýnaldyq menshikke tıesili jáne qalalyq qyzmetterdiń qaramaǵynda.