Almatyda referendýmǵa daıyndyq qalaı júrip jatyr
ALMATY. KAZINFORM – Elimizdiń jańa Konstıtýtsııasy boıynsha jalpyhalyqtyq referendým 15 naýryzda ótedi. Aldaǵy mańyzdy oqıǵaǵa megapolıste daıyndyq qalaı júrip jatqany týraly Almaty qalasy aýmaqtyq referendým komıssııasy túsindirdi.
Aýmaqtyq komıssııanyń málimetinshe, daıyndyq jumystary Qazaqstan Respýblıkasy Ortalyq referendým komıssııasy bekitken negizgi is-sharalardyń kúntizbelik josparyna sáıkes júrgizilip jatyr.
Almatyda 9 aýmaqtyq komıssııa (1 qalalyq jáne 8 aýdandyq), sondaı-aq 654 ýchaskelik referendým komıssııasy jumys isteıdi. Jumys kezeń-kezeńimen uıymdastyrylǵan: komıssııa múshelerin oqytý, ýchaskelerdi tehnıkalyq daıyndaý, azamattar tizimin aıqyndaý, sondaı-aq komıssııa ókilettigi sheńberinde aqparattyq-túsindirý jumystary júrgizilip jatyr.
Daýys berý kúni qalada 654 ýchaske, sonyń ishinde ýaqytsha tirkeýde turǵan adamdarǵa arnalǵan ýchaskeler de jumys isteıtin bolady.
Qansha adam qatysady
Aqpan aıyndaǵy jaǵdaı boıynsha referendýmǵa qatysýǵa quqyǵy bar azamattardyń tizimine 1,3 mıllıonǵa jýyq adam engizildi. Tizimderdi jergilikti atqarýshy organdar qalyptastyrady, sondyqtan olardy naqtylaý jumysy áli de júrip jatyr. Tizimniń sońǵy nusqasyn ýchaskelik komıssııalarǵa 22 aqpan kúni — daýys berýge 20 kún qalǵanda berý josparlanǵan.
Tizimder berilgennen keıin ýchaskelik komıssııalar daýys berý kúni, ýaqyty jáne ýchaske mekenjaıy kórsetilgen shaqyrý qaǵazdaryn jibere bastaıdy.
Daýys berý ýchaskesin qalaı bilýge bolady?
Qala turǵyndary tizimde bar-joǵyn tekserip, ýchaske mekenjaıyn birneshe tásilmen bile alady. Mysaly biryńǵaı Call-ortalyqqa habarlasyp, 1308 nómiri arqyly daýys berý tártibi men ýchaskeler týraly aqparat alýǵa bolady. Odan bólek daýys berýshiler tizimi jasaqtalǵan soń, qala ákimdiginiń resmı saıty, Open Almaty platformasy jáne Telegram-bot arqyly tekserý múmkindigi ashylady.
Sondaı-aq qalada azamattardy ýaqytsha tirkeý servısteri uıymdastyrylady. Olar 40 referendým ýchaskesinde ashylmaq. Bir eskeretini – tirkeý máselesi ýákiletti memlekettik organdardyń quzyretine jatady, al komıssııalar tizimdi tek usynylǵan derekter negizinde jasaqtaıdy.
Barlyǵyna birdeı qoljetimdilik
Ýchaskelerde qoldanystaǵy nusqaýlyqtarǵa sáıkes barlyq daýys berýshilerge qoljetimdilik qamtamasyz etiledi. Mundaı oryndar birinshi qabattarda ornalasyp, pandýstarmen, tutqalarmen jabdyqtalǵan bolady. Іshinde tirek-qımyl apparaty buzylǵan azamattardyń qajettilikterin eskere otyryp, jasyryn daýys berý kabınalary ornatylady jáne taktıldi kórsetkishter qoıylady. Kózi nashar kóretinder úshin lýpalar men Braıl shrıftimen jazylǵan trafaretter qarastyrylǵan.
Sonymen qatar múgedektigi bar azamattar úshin arnaıy oryn jabdyqtalady. Onda arnaıy kompıýter, qulaqqaptar, qosymsha jaryq jáne úlkeıtkish quraldar bolady. Al densaýlyǵyna baılanysty nemese naýqasqa kútim jasaýyna baılanysty ýchaskege kele almaıtyn azamattar turǵylyqty jeri boıynsha óz úıinde daýys bere alady. Ol úshin refrendým kúni jergilikti ýaqyt boıynsha saǵat 12:00-den keshiktirmeı ýchaskelik komıssııaǵa jazbasha ótinish berý qajet.
Ýchaskelerdiń jumys ýaqyty
Daýys berý jergilikti ýaqyt boıynsha saǵat 07:00-den 20:00-ge deıin ótedi. Biraq aýmaqtyq komıssııalar ákimder men ýchaskelik komıssııalardyń usynysy boıynsha daýys berýdiń bastalý jáne aıaqtalý ýaqytyn ózgeshe belgileýge quqyly. Degenmen, daýys berý tańǵy 06:00-den erte bastalmaýy jáne túngi 22:00-den kesh aıaqtalmaýy tıis. Ózgerister bolǵan jaǵdaıda azamattarǵa qosymsha habarlanady.
Almatyda referendým ótkizýge 4 552 ýchaskelik komıssııa múshesi jumyldyrylǵan. Daýys berýdi uıymdastyrý jáne daýystardy sanaýdy qoldanystaǵy zańnama aıasynda tek referendým komıssııalary júzege asyrady.
Eske salaıyq, Kóktóbede referendýmǵa deıingi ýaqytty kórsetetin jaryq ınstallıatsııasy iske qosyldy.