Almatydaǵy «Real Madrıd» oıynshylary jatqan qonaqúı mańy jankúıerge toly
ALMATY. KAZINFORM — Ispanııalyq «Real Madrıd» komandasynyń oıynshylary negizgi qurammen Almatyǵa keldi.
Fýtbol áleminiń jaryq juldyzdarynyń Qazaqstanǵa kelýi megapolıske naǵyz fýtbol merekesin ákeldi.
Qazir komanda jaıǵasqan qonaqúıdiń mańynda júzdegen adam jınalǵan.
Adamdardyń kópshiligi súıikti oıynshylarynyń esimderi jazylǵan plakattar ustap alǵan.
Eń jıi atalatyn esimder — Kılıan Mbappe men Vınısıýs Jýnıor.
Sondaı-aq qonaqúı mańynda polıtsııa men kúzetshiler qoǵamdyq tártipti qadaǵalap júr.
Іshke bógde adamdar kirgizilmeıdi.
Almaty polıtsııasy bul oıyn aldynda fýtbol jankúıerlerine úndeý jasady.
Qalalyq polıtsııa departamentiniń málimetinshe, tártip pen qaýipsizdikti qamtamasyz etý úshin 2,5 myńnan astam qyzmetker tartylady.
— Erteń qalamyzda «Qaırat» — «Real Madrıd» arasyndaǵy fýtbol matchy ótip, úlken oqıǵanyń ordasyna aınalady. Biz álemniń túkpir-túkpirinen kelgen jankúıerlerdi kórgenimizge qýanyshtymyz. Bul biz úshin sport merekesi ǵana emes, Almatynyń shynaıy kelbetin — qonaqjaılyǵyn, qurmetin jáne joǵary mádenıetin kórsetýge úlken múmkindik. Komandany qoldańyzdar, biraq mádenıetti túrde. Qalamyzdy taza ustaıyq, bir-birimizge jáne qonaqtarǵa qurmetpen qaraıyq. Sol arqyly Almaty men búkil elimizdiń ımıdjine úles qosamyz, — dedi Jergilikti polıtsııa qyzmeti basqarma bastyǵynyń orynbasary Tımýr Noǵaıbaev.
Polıtsııa ókili match kúni qozǵalysqa ishinara shekteýler engiziletinin atap ótti.
Quqyq qorǵaý organdary turǵyndardan marshrýttaryn aldyn ala josparlaýdy, ýaqytsha is-sharaǵa túsinistikpen qaraýdy jáne kóshede, kólikte ári stadıonda tártipti qatań saqtaýdy suraıdy.
Eske salaıyq, buǵan deıin «Real Madrıd» Almatyǵa kelgenin jazǵanbyz.