Almatyda Raıymbek dańǵylyn Shyǵys aınalma jolyna deıin uzartý úshin 54 ýchaske alynady

ALMATY. KAZINFORM – Almatyda Raıymbek dańǵylyn uzartý jer telimderin alý jumysy bastaldy.

Almaty qalasy ákimdiginiń 2026 jylǵy 21 qańtardaǵy №1/1-85 qaýlysyna sáıkes, Raıymbek dańǵylyn Jetisý kóshesinen Shyǵys aınalma avtomobıl jolyna deıin uzartý úshin memleket muqtajyna 54 jer ýchaskesi alynady. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengen.

Menshik ıelerine Almaty qalasynyń jer qatynastary basqarmasy zańnamamen belgilengen tártipte ótemaqy tóleýdi qamtamasyz etedi. Jer telimderi tolyqtaı alynǵannan keıin Almaty qalasy jol ınfraqurylymyn damytý basqarmasynyń teńgerimine beriledi.

Eske salaıyq, buǵan deıin Almatyda 2026 jyly qandaı kósheler uzartylatynyn jazǵanbyz. Olardyń qatarynda Saın kóshesi (Rysqulov dańǵylynan Móńke bı kóshesine deıin), Abaı dańǵyly (qala shekarasynan Úlken Almaty aınalma jolyna deıin), Tóle bı kóshesi (ıAsaýı kóshesinen qala shekarasyna deıin), Tilendıev kóshesi (Rysqulov dańǵylynan qala shekarasyna deıin), Jubanov kóshesi (Momyshuly kóshesinen qala shekarasyna deıin), Raıymbek batyr dańǵyly (Jetisý kóshesinen Shyǵys aınalma avtokólik jolyna deıin) bar.