Almatyda Raıymbek dańǵyly jabylady
ALMATY. KAZINFORM — Almatyda Raıymbek dańǵylynyń bir bóligi ýaqytsha jabylady.Almaty ákimdiginen málim etkendeı, 5 shilde saǵat 23:00 bastap 6 shilde tańǵy saǵat 08:00 deıin Raıymbek dańǵylynyń boıymen Ahrımenko kóshesinen bastap Ótegen batyr kóshesine deıin eki baǵytta kólik qozǵalysy jartylaı shekteledi.
— Ýaqytsha shekteý jylýmen jabdyqtaý jelilerin aldaǵy jylytý maýsymyna daıyndaý aıasynda, 1983 jyly paıdalanýǵa berilgen magıstraldyq qubyrjol ýchaskesinde jóndeý jumystarynyń qaýipsizdigin qamtamasyz etý úshin engiziledi, — delingen habarlamada.
Osyǵan deıin Almatyda Abaı dańǵyly men Markov kóshesi eki aıǵa jabylatyny týraly jazǵanbyz.
Jalpy, bıyl qala boıynsha 39 shaqyrym jylý jelisin qaıta jańartý josparlanǵan. Bul jelilerdiń tozý deńgeıin 54%-ǵa deıin tómendetýge múmkindik beredi.