Almatyda Radostovets kóshesiniń bóligi 1,5 aıǵa jabylady
ALMATY. KAZINFORM – Almatyda Radostovets kóshesiniń boıymen qozǵalys bir jarym aıǵa shekteledi.
«Almaty jylý júıesi» kompanııasynyń málimetinshe, aldaǵy jylytý maýsymyna daıyndyq aıasynda Almaty qalasynyń Bostandyq aýdanynda 1973 jyly paıdalanýǵa berilgen 1,5 km jýyq qubyr jelisi aýystyrylady.
Osyǵan baılanysty 2025 jylǵy 14 maýsym men 4 tamyz aralyǵynda Radostovets kóshesiniń Solodovnıkov kóshesinen Jandosov kóshesine deıingi aralyǵynda kólik qozǵalysy ýaqytsha shekteledi. Qozǵalys eki baǵyt boıynsha da toqtatylady.
— Ýaqytsha shekteý jumystardyń qaýipsizdigin qamtamasyz etý maqsatynda engizilip otyr. Jóndeý kezinde kósheniń júris bóliginiń astymen ótetin magıstraldyq qubyr jelisi qaıta jańartylady. Jóndeý jumystary júrgizilgen kezeńde jylý jelisine qosylǵan tutynýshylar úshin ystyq sý berý toqtatylmaıdy, — dep habarlady «Almaty jylý júıesi».
Eske salaıyq, 31 mamyrdan 20 shildege deıin Bógenbaı batyr kóshesiniń bir bóligi, 31 mamyrdan 30 maýsymǵa deıin Túrksib aýdanynda Kotelnıkov kóshesiniń bir bóligi jabylady.
Sondaı-aq 1 maýsymnan bastap 20 tamyzǵa deıin Sátpaev kóshesimen Masanchı kóshesinen bastap Baıtursynov kóshesine deıin eki baǵytta qozǵalys shekteledi. 2 maýsymnan bastap 20 tamyzǵa deıin Ǵabdýllın kóshesinde Rımskıı-Korsakov kóshesinen bastap Nahımov kóshesine deıin eki baǵytta qozǵalys shekteledi.