Almatydaǵy áskerı ınstıtýtynyń alǵashqy túlekteri oqýdy támamdady

ALMATY. KAZINFORM – Radıoelektronıka jáne baılanys áskerı-ınjenerlik ınstıtýtynyń oqý ortalyǵynda áskerı mamandyq berý týraly kýálik alǵan kishi mamandardyń saltanatty túrde oqýdy aıaqtaý rásimi ótti. 

Qarýly kúshter qataryna shaqyrylǵan merzimdi qyzmettiń áskerı qyzmetshileri 5 mamandyq boıynsha bilim aldy. Úsh aı boıy sarbazdarǵa jaýyngerlik, arnaıy jáne tehnıkalyq daıyndyq sabaqtary ótkizildi.

– Bilim ordasynyń oqý ortalyǵynda odan ári qyzmet ótkerý úshin qajetti bilim aldym. Komandırlerge bastapqy daıyndyqty úıretkenderi jáne kórsetken qamqorlyqtary úshin alǵys aıtamyn. Alda ómirimdi armııamen baılanystyrýdy josparlap otyrmyn, - dedi kýrs túlegi Jappar Ómirserik.

Oqý aıaqtalǵannan keıin radıotehnıkalyq áskerler mamandary, «Igla» jyljymaly zenıttik zymyran kesheniniń zenıt-atqyshtary, ZZK-75, ZZK-300 qolmen súıemeldeý operatorlary jáne dızelıst-elektrıkter Áýe qorǵanysy kúshteri ÁShQQ áskerleriniń quramalary men bólimderine jiberiletin bolady.

Bul lekpen kúzde áskerge shaqyrylǵan 130 sarbaz áskerı eseptik mamandyq boıynsha oqyǵanyn aıta ketelik.