Almatyda iri jol apatynan úsh adam zardap shekti
ALMATY. KAZINFORM – Jetisý aýdanynda tórt kólik soqtyǵysqan.
Qalalyq polıtsııa departamentiniń málimetinshe, apat shamamen saǵat 00:25-te bolǵan. Rysqulov dańǵylymen shyǵysqa qaraı júrip kele jatqan Haval kóliginiń júrgizýshisi rýldi basqara almaı, sol baǵytta kele jatqan Chery kóligimen soqtyǵysqan.
Osydan keıin Haval qarsy baǵytqa shyǵyp, batysqa qaraı júrip kele jatqan taǵy eki kólikke - Audi jáne Hongqi-ge soqtyǵysqan.
- Apat saldarynan Haval júrgizýshisi aýyr halde jaqyn mańdaǵy qalalyq aýrýhanaǵa jetkizildi, al taǵy eki adam - Audi júrgizýshisi men Hongqi jolaýshysy oblystyq aýrýhanaǵa jetkizildi, - dep atap ótti polıtsııanyń baspasóz qyzmeti.
Apattyń mán-jaıyn Jetisý aýdandyq polıtsııa bólimi anyqtap jatyr.
Aıta keteıik, Almaty - Bishkek tasjolynda 6 adam jol apatynan kóz jumdy.