Almatyda iri narkologııalyq zerthananyń kózi joıyldy

ALMATY. KAZINFORM – Almatyda esirtki qylmysyna qarsy belsendi kúres jalǵasyp jatyr. 2024 jyldyń 22 qazanynda qala prokýratýrasynyń úılestirýimen iri esirtki zerthanasynyń jumysy toqtatyldy. Bul týraly Almaty qalasy prokýratýrasynyń baspasóz qyzmeti málim etti. 

Operatsııa barysynda qylmystyq kásiporynynyń uıymdastyrýshysy ustaldy. 

Zerthanany tintý kezinde 3 polıetılen paketke oralǵan 15 kg daıyn mefedron, árqaısysy 30 lıtrlik 36 kanıstr, 10 lıtrlik 4 kanıstr, bes lıtrlik 5 shelek, 8 lıtrlik suıyqtyq saqtalǵan plastık bótelkeler, sondaı-aq sorý júıesi bar monshasy, onyń ishinde reagentterdi aralastyrý úshin qoldanylatyn 150 lıtrlik bóshke, elektrondy tarazy, tynys alý maskalary, aralastyrýǵa beıimdelgen buraǵysh, 8 plastıkalyq naýalartabylyp tárkilendi, - delingen prokýratýranyń habarlamasynda. 

Tárkilengen barlyq qural-jabdyqtar men zattar saraptamaǵa jiberildi. Zerthanany uıymdastyrýshy ýaqytsha ustaý ızolıatoryna qamaldy.

Aǵymdaǵy jyly Almaty qalasynyń prokýratýrasy quqyq qorǵaý organdarymen birlese otyryp, qalada belsendi jumys istep turǵan 22 narkologııalyq zerthananyń jolyn kesti.

Almaty qalasynyń prokýratýrasy qylmysqa jedel den qoıý jáne onyń aldyn alý maqsatynda azamattardy kúdikti tulǵalar men esirtkiniń zańsyz aınalymyna qatysy bolýy múmkin nysandar týraly habarlaýǵa shaqyrady.

Eske sala keteıik, buǵan deıin bıyl zańsyz aınalymnan 1 tonnadan astam esirtki tárkilengenin habarlaǵan bolatynbyz.