Almatyda iri qonaqúı qurylysy 13 jyl bitpeı tur
ALMATY. KAZINFORM – 13 jyl buryn Esentaı ózeniniń jaǵalaýynda «The Kempinski Grand Asia Hotel» qonaqúıiniń qurylysy bastalǵan bolatyn. Alaıda kóp uzamaı jumys toqtap, búginge deıin qaıta jandanǵan joq. Kazinform agenttiginiń fototilshisi nysanǵa baryp, onyń búgingi kórinisin kórsetti.
Tóbesinde aınalmaly meıramhanasy men basseıni bar qonaqúı kesheni qalanyń aıtýly jobalarynyń birine aınalýy tıis edi. Búginde arhıtektýrasy erekshe shyny ǵımarat almatylyqtarǵa jaqsy tanys. Ol Medeý aýdany, Marat Ospanov kóshesi, 82 mekenjaıynda ornalasqan.
Fototilshimiz nysan aýmaǵy kúzetiletinin baıqady. Kireberistiń janynda kúzetshisi bar shaǵyn dúńgirshek ornalasqan. Ǵımarattyń ózi bos tur, biraq ishinde ornatylǵan jylytý batareıalaryn, shkaftardy jáne keıbir keńse jıhazdaryn baıqaýǵa bolady.
Kireberis bóligi aǵash qorshaýmen jabylǵan. Ǵımarattyń qasynda qurylys materıaldaryn da kórýge bolady. Aýmaqta asfalt quıylǵan ári aınalasynda qoqys joq. Nysan ári qaraı paıdalanýǵa daıyndalyp jatqandaı áser qaldyrady, biraq munda jumysshylar júrgen baıqalmady.
Qonaqúıdiń qasbeti jaǵynan nebári birneshe metr jerde Esentaı ózeni aǵyp jatyr. Ǵımarattyń eki jaǵynda ózen arqyly ótýge bolatyn kópirler ornalasqan. Olardyń astynda qala turǵyndary jıi serýendeıtin jaǵalaý bar. Ǵımarat janynda transformator dúńgirshegi de bar, al keıbir beton qabyrǵalardan graffıtılerdi kórýge bolady.
«Kazinform» agenttigi nysannyń osy ýaqytqa deıin nege paıdalanýǵa berilmegenin jáne aıaqtalmaǵan keshenge qatysty qandaı josparlar bar ekenin bilý úshin ákimdikke saýal joldady. Sondaı-aq qurylysqa tıisti ruqsattyń bar-joǵyn suradyq.
Qala qurylysyn baqylaý basqarmasy bul qonaqúı kesheniniń qurylysy belgilengen tártippen berilgen ruqsat qujattary negizinde júrgizilgenin habarlady.
Atap aıtqanda:
• 2012 jylǵy 15 qarashadaǵy sáýlet-josparlaý tapsyrmasy (SJT);
• 2013 jylǵy 22 sáýirdegi eskızdik jobany kelisý;
• 2013 jylǵy 12 naýryzdaǵy, 9 sáýirdegi jáne 2014 jylǵy 21 aqpandaǵy Sý resýrstaryn paıdalanýdy retteý jáne qorǵaý jónindegi basseındik ınspektsııanyń kelisimderi;
• 2013 jylǵy 25 shildedegi jáne 28 jeltoqsandaǵy memlekettik saraptamanyń oń qorytyndylary;
• 2013 jylǵy 7 tamyzdaǵy jáne 2014 jylǵy 22 qańtardaǵy qurylys-montajdaý jumystarynyń bastalǵany týraly habarlamalar.
Qurylysqa tapsyrys berýshi — «AZIıA GRÝPP» Qazaqstan-Germanııa birlesken kásiporny» JShS. Qurylys jumystary 2013 jylǵy 7 tamyzda bastalǵan. Odan bólek vedomstvo ókilderi qurylysty aıaqtaý nemese nysandy buzý týraly sheshimdi tikeleı tapsyrys berýshi qabyldaıtynyn atap ótti.
Eske salaıyq, buǵan deıin Almatydaǵy Esentaı ózeniniń jaǵasynda ornalasqan taǵy bir elıtalyq qonaqúı ǵımaratyna aldaǵy ýaqytta qalalyq sottar kóshýi múmkin ekenin jazǵanbyz. Ol kezinde Qaırat Satybaldynyń menshiginde bolǵan.