Almatyda iri kólemde sıntetıkalyq esirtki men gaz tapanshasy tárkilendi
ASTANA. KAZINFORM — Almatyda arnaıy operatsııa barysynda polıtseıler iri kólemdegi sıntetıkalyq esirtkini tárkiledi.
Bostandyq aýdanynda polıtsııa qyzmetkerleri zańsyz zattar tasymaldanýy múmkin degen kúdikpen kólikti toqtatty. Kólikti tekserý kezinde ishinen untaq tárizdi zat salynǵan ondaǵan orama, uıaly telefondar, qaptama materıaldary, elektrondy tarazy, medıtsınalyq pıpetkalar jáne gaz tapanshasy tabyldy.
Kúdiktilerdiń biriniń úıin tintý kezinde tártip saqshylary esirtkige uqsas zat salynǵan qosymsha ydystardy, olardy býyp-túıýge arnalǵan materıaldar men esirtkini satýǵa daıyndaýǵa paıdalanylǵan qural-jabdyqtardy tárkiledi.
Almaty qalalyq Polıtsııa departamentiniń málimetinshe, aldyn ala derek negizinde 44 jastaǵy er adam birneshe aı boıy sıntetıkalyq esirtkini «jasyryn oryndarǵa qaldyrý» tásili arqyly taratýmen aınalysqany anyqtaldy. Onymen birge 39 jastaǵy áıel de ustaldy.
Kúdiktiler qamaýǵa alyndy. Qazirgi ýaqytta qajetti tergeý amaldary júrgizilip jatyr.
Aıta keteıik, elimizde shildeniń alǵashqy onkúndiginde 121 keliden astam sıntetıkalyq esirtki tárkilendi.
