Almatyda iri esirtki zerthanasyn ashqan adam 11 jylǵa sottaldy
ALMATY. KAZINFORM - Almatyda iri esirtki zerthanasyn ashqan er adam 11 jylǵa bas bostandyǵynan aıyryldy.
Almaty qalalyq Polıtsııa departamentiniń málimetinshe, Bostandyq aýdanyndaǵy kópqabatty turǵyn úı kesheninde 27 jastaǵy jigit esirtki zerthanasyn uıymdastyrǵan.
«Esirtki qylmysyna qarsy kúres basqarmasynyń qyzmetkerleri páterdi tintý barysynda medıtsınalyq shprıtster, qolǵaptar, lakmýs qaǵazy, jasyl tústi ızolenta, prekýrsorlar men tuz qyshqyly bar ydystar, arnaıy zerthanalyq shyny ydystar, elektrondy tarazylar jáne basqa da sıntetıkalyq psıhotroptyq zatty óndirýge arnalǵan quraldardy tárkiledi. Daıyn ónim – krıstaldar túrindegi aqshyl tústi zat. Saraptama qorytyndysyna sáıkes, bul zat jalpy salmaǵy 139,57 gramm Alfa-PVP esirtki ekeni anyqtaldy», – dedi Almaty qalalyq polıtsııa departamenti bastyǵynyń orynbasary Qýatbek Naýatov.
Polıtsııa ókiliniń aıtýynsha, sotta aıyptalýshynyń qylmysy dáleldenip, sottaldy.
«Almaty qalasynyń qylmystyq ister jónindegi mamandandyrylǵan aýdanaralyq sotynyń úkimimen kúdikti esirtki qylmysyn jasaǵany úshin kináli dep tanyldy. Ol 11 jylǵa bas bostandyǵynan aıyryldy»,- dedi ol.
