Almatyda Qadam saıabaǵy salynyp jatyr
ALMATY. KAZINFORM – Áýezov aýdanynda qazan aıynyń sońyna deıin 11 kóp qabatty turǵyn úıdiń qasbetin jóndep, 10 aýlaǵa kúrdeli jóndeý júrgizip, jańa Qadam saıabaǵyn ashý josparlanyp otyr.
Sonymen qatar aýdanda turǵyn úı qoryn jańartý jumysy da jalǵasyn taýyp, Jubanov kóshesinde qoǵamdyq keńistikti abattandyrý jumysy aıaqtaldy. Óńirlik kommýnıkatsııalar qyzmetinde aýdan ákimi Abzal Egemberdıev osy jumystyń aıaq alysy týraly aıtyp berdi.
Aýdanda 1 917 kóp qabatty turǵyn úı bar. Onyń 797-si 1960–1970 jyly salynǵan. Aýdan basshysynyń aıtýynsha, qazir Abaı dańǵylynyń boıyndaǵy 11 úıdiń qasbeti qosa jóndelip jatyr eken.
— 2023–2029 jylǵa arnalǵan turǵyn úı-kommýnaldyq ınfraqurylymdy damytý tujyrymdamasy aıasynda 2026 jylǵa 40 kópqabatty turǵyn úıdiń shatyry men ınjenerlik jelisine kúrdeli jóndeý júrgizý máselesi pysyqtaldy. Taǵy 19 úıde lıfti aýystyrý jaǵyn da qosa qarastyrdyq. Bul jumys negizgi konstrýktsııalary men kommýnıkatsııalaryn jańartýdy qajet etetin úılerdi qamtıdy, — dep baıandady aýdan ákimi Abzal Egemberdıev.
№ 5 shaǵyn aýdan men Aqsaı-4 yqsham aýdanyndaǵy 10 aýla aýmaǵyna kúrdeli jóndeý jumysy qyrkúıek aıynda bastaldy. Jumysty qazan aıynyń sońyna deıin aıaqtaýdy oılastyryp otyr.
— Bıyl 135 aýla ishinara jóndeldi. Fýtbol men basketbol alańynyń qorshaýy men jabyndary, balalar men sport alańynyń jabyny jóndelip, shaǵyn sáýlet nysandary ornatyldy. Bul aýdannyń ár bóligindegi aýlalardy kezeń-kezeńimen retke keltirýge múmkindik beredi, — deıdi aýdan ákimi.
Aıaqtalǵan jobanyń biri — quny 2,603 mlrd teńge bolǵan Jubanov kóshesin abattandyrý jumysy. Munda balalar men sport alańy jańartylyp, kóshe jıhazdary ornatyldy, jaryqtandyrý tirekteri aýystyrylyp, jańalary qoıyldy. Sondaı-aq jasyl jelekter egili, avtomatty sýarý júıesi qoıyldy.
Bıyl «Halyq qatysatyn bıýdjet» baǵdarlamasy boıynsha taǵy 29 joba júzege asyryldy. Onyń altaýy qoǵamdyq keńistikterdi abattandyrýǵa, taǵy 23-i aýla aýmaqtaryn jańartýǵa baǵyttalǵan.
— Qadam saıabaǵy Saıyn men Ulyqbek kóshesiniń qıylysynda, aýmaǵy 0,35 gektar bolatyn burynǵy avtoturaqtyń ornynda salynyp jatyr. Munda túrli tabıǵı jabyndardan turatyn taktıldi alleıa, balalar alańy, júgirý joly, syrǵanaý men parkýr aımaqtary, serýendeýge arnalǵan keńistik pen kógaldandyrý jaǵy qarastyrylǵan. Ortalyq element retinde sýburqaǵy, jaryqtandyrylýy jáne «Bolashaqqa qadam» degen jazýy bar arkaly kompozıtsııa ornatylady, — dep tolyqtyrdy sózin Abzal Egemberdıev.
