Almatyda Pýshkın kóshesiniń bir bóligi júrginshiler býlvaryna aınaldy
ALMATY. KAZINFORM — Pýshkın kóshesi boıyndaǵy aýmaqty aýqymdy jańǵyrtý jumystary jalǵasyp jatyr.
Almatynyń qoǵamdyq keńistikterdi damytý basqarmasynyń málimetinshe, joba aýmaǵy Raıymbek dańǵylynan Gogol kóshesine deıingi aralyqty qamtıdy.
— Bul keńistik serýendeýge, demalýǵa jáne qala ortalyǵynyń tynysyn sezinýge qolaıly, zamanaýı qalalyq dálizge aınalyp jatyr. Munda jaı ǵana jańartylǵan trotýar emes, oılastyrylǵan jaryqtandyrý júıesi, avtomatty sýarý tetigi jáne kedergisiz orta qarastyrylǵan tolyqqandy jasyl kóshe qalyptasyp keledi, — delingen habarlamada.
Jobada kógaldandyrýǵa erekshe mán berilgen. Kóshe boıyna shamamen 300 aǵash pen 8 myńǵa jýyq buta otyrǵyzylǵan. Kógaldandyrý kezinde Germanııadaǵy tálimbaqtan ákelingen Frıman úıeńkisi, tózimdi shegirshin, iri japyraqty pallıda, sondaı-aq Túrkııadan jetkizilgen gınkgo bıloba paıdalanyldy.
— Gınkgo aǵashy Almatyda alǵash ret otyrǵyzylyp, qalalyq landshafttyń jańa ári aıshyqty elementine aınalmaq. Jasyl qabatty kókjalbyz, aq sántal «Elegantıssıma», rýgoza raýshany, qyltanbas, japon tobylǵysy men kópirshik tolyqtyryp, jyl boıy túrli reńk pen kórkemdik beredi, — dep habarlady basqarma.
Sonymen qatar jabyndar jańartylyp, jańa kóshe jaryǵy ornatylyp jatyr, tas tóseý jáne sý burý júıesin jasaý jumysy qolǵa alynǵan. Qazir eskirgen trotýarlar men trolleıbýs jelileri tolyǵymen alynyp, kabeldik jelilerdiń negizgi magıstraldary tartyldy, avtomatty sýarý júıesiniń basym bóligi men jaryqtandyrý tirekteri ornatyldy. Rezervýar qurylysy aıaqtalýǵa jaqyn, júrginshiler ınfraqurylymyn qalyptastyrý jáne kógaldandyrý jumystary jalǵasyp jatyr.
— Jańartylyp jatqan aýmaqtyń uzyndyǵy — 1,1 shaqyrym, jalpy kólemi — 6,5 gektar. Nysannyń daıyndyq deńgeıi shamamen 80%-ǵa jetti. Barlyq jumys aıaqtalǵan soń Pýshkın kóshesi Almatynyń tarıhı ortalyǵyn jańa qyrynan tanytatyn, kóleńkesi men jasyl jelegi mol, turǵyndar men qala qonaqtaryna jaıly serýen baǵytyna aınalady. Kóriktendirý jumystary belgilengen kestege saı jalǵasyp, zamanaýı ári qolaıly qalalyq orta qalyptastyrýǵa baǵyttalǵan, — delingen Almatynyń qoǵamdyq keńistikterdi damytý basqarmasy málimetinde.
Eske salaıyq, buǵan deıin Almatynyń Alataý aýdanynda ózen boıynda serýendeıtin jańa keńistik paıda bolǵanyn habarlaǵan edik. Oǵan Alatau Terrenkur ataýy berilgen.
