Almatyda Pýshkın kóshesiniń bóligi jaıaý júrginshiler alleıasyna aınalady
ALMATY. KAZINFORM — Almatyda 31 shildeden bastap Pýshkın kóshesiniń bir bóligi jabylady. Ol aýmaq jaıaý júrginshiler alleıasyna aınalady.
Almaty qalasynyń qoǵamdyq keńistikterdi damytý basqarmasynyń málimetinshe, Raıymbek batyr dańǵylynan Gogol kóshesine deıingi Pýshkın kóshesi boıynda aýmaqty qaıta jańǵyrtý jobasy bastaldy.
31 shildeden bastap qurylys-montajdaý jumystaryna baılanysty Pýshkın kóshesiniń shyǵys jaǵyndaǵy (Raıymbek batyr dańǵylynan Maqataev kóshesine deıin) kólik qozǵalysy ýaqytsha toqtatylady. Jańǵyrtý aıaqtalǵannan keıin bul bólik jaıaý júrginshilerge arnalǵan alleıaǵa aınalyp, kólik qozǵalysy úshin birjola jabylady.
— Qurylys ýaqytynda kólik qozǵalysy Pýshkın kóshesiniń batys jaǵynda ońtústik baǵytta birjaqty tártipte uıymdastyrylady. Atalǵan shekteý sharalary Almaty qalasy Polıtsııa departamenti men Qalalyq mobıldilik basqarmasymen kelisilgen, — dep habarlady ákimdikten.
Eske salaıyq, Almaty-1 temirjol vokzalynyń janynda jańa Arbat ashylady.