Almatyda profılaktıkalyq tekserýlerdi robottar eske salatyn boldy

ASTANA. KAZINFORM — Almatynyń barlyq emhanasynda ADMC jobasy aıasynda daýys robottary engizildi, dep habarlaıdy qala ákimdiginiń baspasóz qyzmeti.

Olar kún saıyn qala turǵyndaryna vaktsınatsııa, skrınıng, flıýorografııa jáne profılaktıkalyq tekserýden ótý úshin júzdegen qońyraý shalady.

Buryn medbıke kúnine nebári 15-20 qońyraý ǵana shalyp, kóp ýaqyt pen emotsıonaldyq kúsh jumsaıtyn. Endi bul kúnde qaıtalanatyn jumysty avtomatty júıe atqarady: robot patsıentpen keri baılanys ornatyp, tekserýden ótý qajettiligin aldyn ala eske salady.

— Daýys robottary bizdiń jumysymyzdy edáýir jeńildetti. Endi biz patsıenttermen sóılesýge jáne sapaly medıtsınalyq kómek kórsetýge kóbirek kóńil bóle alamyz. Bul ýaqyt pen kúsh únemdeıdi, al qala turǵyndary profılaktıkalyq tekserýler týraly der kezinde eskertiledi,  — deıdi № 3 qalalyq emhananyń medbıkesi Baqyt Qusaıynova. 

Robottar qazaq jáne orys tilderinde sóıleıdi jáne jaýap alǵanǵa deıin qońyraý shalýdy jalǵastyrady. Jasandy ıntellekt júıesiniń arqasynda olar myńdaǵan qońyraýdy bir ýaqytta óńdeı alady, bul emhanalardyń tıimdiligin arttyryp, qyzmetkerlerdiń jumysyn jeńildetedi.

Jobany densaýlyq saqtaý salasynyń negizgi servısterin biriktiretin zamanaýı tsıfrlyq medıtsına ortalyǵy Almaty Digital Medical Center júzege asyrǵan. Ortalyq densaýlyq kórsetkishin baqylap, dárigerlerge naýqastarǵa kóbirek ýaqyt bólýge múmkindik beretin 1312 biryńǵaı baılanys ortalyǵy jumys isteıdi. Sondaı-aq, telemedıtsınalyq patronaj jáne onlaın-keńes engizilgen, bul medıtsınalyq kómekti qoljetimdi ári yńǵaıly etedi.

ADMC jobasy tsıfrlyq sheshimderdiń medıtsına qyzmetkerlerine qalaı kómektesetinin jáne patsıentterdi qalaı qoldaıtynyn, Almatynyń densaýlyq saqtaý júıesin zamanaýı ári tıimdi etetinin kórsetedi.

Budan buryn Almatyda bıyl ashylǵan erte ońaltý ortalyǵy 57 balaǵa kómekteskeni belgili boldy.