Aldymyzǵa Qazaqstandy zamanaýı tsıfrlyq memleketke aınaldyrý jóninde órshil maqsat qoıdyq - Prezıdent
ASTANA. KAZINFORM - Almatyda Prezıdent Qasym-Jomart Toqaevtyń tóraǵalyǵymen Jasandy ıntellektini damytý jónindegi keńestiń ekinshi otyrysy ótti. Memleket basshysy jıynda sóılegen sózinde álem tehnologııalyq transformatsııanyń múldem jańa kezeńine qadam basqanyna nazar aýdardy.
Prezıdenttiń aıtýynsha, qazirgi ózgerister XIX-XX ǵasyrlardaǵy ındýstrııalyq revolıýtsııamen salystyrýǵa kelmeıdi. Óıtkeni onyń jyldamdyǵy men aýqymdylyǵy sonshalyq, fızıkalyq bolmys pen tsıfrlyq keńistik arasyndaǵy shekara joıylyp barady.
– Jasandy ıntellekt jahandyq ekonomıkanyń basty arqaýy, al úlken derekter qory asa mańyzdy resýrs sanala b astady. Sondyqtan Qazaqstan jasandy ıntellektini asa mańyzdy strategııalyq baǵyt retinde qarastyrady. Aldymyzǵa Qazaqstandy zamanaýı tsıfrlyq memleketke aınaldyrý jóninde órshil maqsat qoıdyq. Tıisti ınstıtýtsıonaldyq alǵysharttar men bazalyq ınfraqurylym qalyptasty. Endi jasandy ıntellekt tehnologııasyn ekonomıkanyń barlyq salasyna engizýimiz qajet. Bul rette «tehnologııalyq saqtyq sharalaryn» basshylyqqa alyp, ulttyq múddeni de umytpaǵan jón, – dedi Prezıdent.
Prezıdent Úkimetke tsıfrlyq ekonomıkanyń ІJÓ-ge áserin baǵalaý boıynsha usynystar engizýdi tapsyrdy.
Qasym-Jomart Toqaevtyń paıymdaýynsha, jańa tehnologııalyq paradıgmaǵa kóshý úshin qazirgi jaǵdaıǵa obektıvti, shynaıy baǵa berý qajet.
– Tsıfrlyq ekonomıka týraly tujyrymdama áli tolyq jasaqtalmaǵan, qoldanystaǵy ádisteme bir izge túspegen. Іshki jalpy ónimdi bes paıyzǵa jetkizý týraly aıtqanda, naqty ekonomıka sektoryndaǵy ósim men ınnovatsııa nátıjesindegi tabystyń ara jigin ajyrata bilý kerek. Jalpylama kórsetkishter kóbine jumystyń tıimdiligin emes, aldamshy kórinis qalyptastyryp jatady. Sondyqtan bul tsıfrlandyrý men jasandy ıntellektiniń el ekonomıkasyna qosqan naqty úlesin baǵalaýǵa múmkindik bermeıdi. Úkimet Strategııalyq josparlaý jáne reformalar agenttigimen birlesip, tsıfrlyq ekonomıkanyń ІJÓ-ge áserin baǵalaý boıynsha usynystar engizgeni jón, – dedi Memleket basshysy.
Sondaı-aq Memleket basshysy JI tıimdi qoldaný úshin derekterge baǵdarlanǵan basqarý modelin engizý kerektigin atap ótti.
