Almatyda prezıdenttik polk sarbazdary ant qabyldady
ALMATY. KAZINFORM – 28 gvardııashy-panfılovshylar saıabaǵynda QR Memlekettik kúzet qyzmeti Aıryqsha maqsattaǵy kúshteriniń áskerı bólimi «Batyr» prezıdenttik polki sarbazdarynyń Áskerı ant qabyldaý rásimi ótti.
0111 áskerı bóliminiń komandır orynbasary, polkovnık Baqyt Ospanov «Batyr» prezıdenttik polkiniń sarbazdary elimizdiń barlyq óńirinen iriktelip alynǵanyn aıtty.
– Búgin QR Memlekettik kúzet qyzmeti Aıryqsha maqsattaǵy kúshteriniń áskerı bólimi «Batyr» prezıdenttik polki 0111 áskerı bóliminiń sarbazdarynyń ant qabyldaý rásimi ótti. Saltanatty rásimge 100-ge jas sarbaz qatysty. Olarǵa qoıylǵan talaptar: boıy 180 sm-den joǵary jáne 195 sm-den aspaıtyn, bilimi orta bilimnen tómen emes, densaýlyǵy jaqsy azamat bolýy qajet. Merzimdi áskerı qyzmet sarbazdary elimizdiń barlyq aımaǵy men respýblıkalyq mańyzy bar qalalarynan iriktelip alynǵan. Olar áskerı bólimderdiń dalalyq oqý ortalyqtarynda jańa shaqyrylym sarbazdaryn daıyndaý kýrsynan ótti. Merzimdi áskerı qyzmetti aıaqtaǵandar qalaýy boıynsha qyzmetti kelisimshart negizinde jalǵastyra alady, odan ári olardyń arnaýly memlekettik organnyń qyzmetkeri jáne ofıtseri bolyp, kúzetiletin tulǵalar men obektilerdiń qaýipsizdigin qamtamasyz etý boıynsha mindetterdi atqarý múmkindigi bar, - dedi polkovnık Baqyt Ospanov.
Áskerı ant qabyldaǵan merzimdi qyzmet sarbazdary QR MKQ Aıryqsha maqsattaǵy kúshteri atqaratyn: Qazaqstan Respýblıkasynyń Memlekettik Týy men Memlekettik Eltańbasy etalondaryn kúzetý, Memleket basshysynyń qatysýymen ótetin protokoldyq is-sharalarǵa qatysý, kúzetiletin tulǵalar men obektilerdiń qaýipsizdigin qamtamasyz etý sekildi mindetterdi atqarýǵa kirisedi.
– Qurmetti ata-analar, sizder bizdi maqtan tutady degen úmittemiz. Sebebi biz batyr eldiń urpaqtary kezindegi batyr atalarymyzdyń jolyn qýyp, ózimizdiń Otan aldyndaǵy boryshymyzdy Memlekettik kúzet qyzmeti Aıryqsha maqsattaǵy kúshter «Batyr» prezıdenttik polki qatarynda óteý baqyty buıyryp tur. Endigi mindet – halqymyzǵa qalaýly, elimizge eleýli Otan qorǵaýshy bolyp, óz mindetimizdi abyroımen atqarý, - dedi 0111 áskerı bóliminiń qatardaǵy jaýyngeri Meıirjan Amanhan.
Áskerı ant qabyldaý saltanatyna jas sarbazdardyń ata-analary men jaqyndary qatysty.
– Men búgin ulym – Elnurdyń ant qabyldaý rásiminiń kýágeri boldym. Áskerı ant qabyldaý – ol áskerı dástúr. Áskerı qyzmetti adal atqaryp, patrıotızmmen Otanǵa jáne QR Prezıdentine adal bolý, sondaı-aq qyzmet atqarǵany úshin maqtanysh sezimde bolý – ár er azamattyń aldynda turǵan mańyzdy qadam. Qurmetti sarbazdar, Otan aldyndaǵy boryshty adal atqaryp, ata-analardyń úmitin aqtap, aman-esen úıge oralýlaryńa tilektespin. Táýelsizdigimiz ben tutastyǵymyzdy qas qaqpaı kúzetip turǵan Ulttyq áskerimizdiń aıbyny arta bersin, - dedi ata-analar atynan Janar Dosaeva.
