Almatyda Prezıdent rezıdentsııasynyń ornyndaǵy saıabaq qurylysyna 2,2 mlrd teńge jumsalady

ALMATY. KAZINFORM — Almatyda Prezıdent rezıdentsııasynyń ornynda salynyp jatqan jańa saıabaq jeke ınvestıtsııalar esebinen de qarjylandyrylady. 

Joba Nazarbaev dańǵylynyń batysy men Gandı kóshesiniń soltústiginde ornalasqan 4,16 gektar aýmaqta júzege asyrylyp jatyr. Kazinform agenttiginiń saýalyna jaýap bergen Almaty qalasynyń qoǵamdyq keńistikterdi damytý basqarmasynyń málimetinshe, jobanyń birinshi kezeńin júzege asyrý úshin bıýdjetten 944,5 mln teńge bólingen. Onyń ishinde qurylys jumystaryna bólingen negizgi soma — 821,4 mln teńge. Al avtorlyq jáne tehnıkalyq qadaǵalaýǵa 3,3 mln teńge jáne 18,7 mln teńge qarastyrylǵan.

— Bıýdjet shyǵyndaryn ońtaılandyrý maqsatynda jobaǵa jeke qarajatty tartý arqyly qosymsha qarjylandyrý kózdelgen. Demeýshiler qarajatynyń jalpy somasy — 2,2 mlrd teńge. Bul qarajat qaıtarymsyz negizde usynyldy, — delingen resmı jaýapta.

Buǵan deıin atalǵan aýmaqta uńǵyma burǵylanyp, qurylymdardy betondaý jumystary júrgizilip jatqany habarlanǵan bolatyn.

— Qazirgi tańda negizgi buzý jáne daıyndyq jumystary aıaqtalyp, abattandyrý jumystary júrgizilip jatyr, — dep habarlady basqarmadan.

Eske salaıyq, Prezıdent rezıdentsııasynyń ornyndaǵy jańa saıabaq qandaı bolatynyn jazǵanbyz. Onda qys kezinde jumys isteıtin muz aıdynyn ashý, arnaıy avtoturaq daıyndaý, 1,5 myń aǵash otyrǵyzý jáne ózge de jumystar josparlanǵan.

2022 jyly 5 qańtar kúni Prezıdent rezıdentsııasyn bir top adam basyp alyp, órtep jiberdi. Sondyqtan Memleket basshysynyń sheshimimen bul ǵımarat súrilip, onyń ornyna saıabaq salynatyny habarlandy.

Keıin Mamandar Almatydaǵy Prezıdent rezıdentsııasy nelikten súriletinin túsindirdi. 

2022 jyly naýryz aıynda Almatydaǵy Prezıdent rezıdentsııasy tarıhı eskertkishter tiziminen alynyp tastaldy.

2022 jyly qazan aıynda Almatynyń eks-ákimi Erbolat Dosaev Prezıdent rezıdentsııasyn súrý jumystary is júzinde aıaqtalǵanyn aıtty.