Almatyda Prezıdent rezıdentsııasynyń ornyndaǵy saıabaq qashan ashylady
ALMATY. KAZINFORM - Aldaǵy ýaqytta Prezıdenttiń qyzmettik rezıdentsııasynyń ornynda saıabaq salý jumystary bastalady.
Kazinform agenttiginiń saýalyna jaýap bergen Almaty ákimdigi saıabaqtyń jobasy túzetilip, qaıta saraptamaǵa jiberilgenin habarlady.
— Almaty qalasynyń Qoǵamdyq keńistikterdi damytý basqarmasy Nazarbaev dańǵylynyń batysy men Gandı kóshesiniń soltústiginde saıabaq salýǵa aýmaqty qaıta qurý jobasyn (master-jospar) ázirlep, ony iske asyrý boıynsha jumystar júrgizip jatyr, - delingen jaýapta.
Sondaı-aq ákimdik jaýabyna sáıkes, qurylys jumystary saraptama aıaqtalǵannan keıin bastalady.
— Búgingi tańda saraptama qorytyndysy kútilýde, sodan keıin qurylys-montajdaý jumystary bastalady, - dep habarlady ákimdikten.
Aıta ketken jón, qazir rezıdentsııa orny qańyrap, bos tur.
Tarıhı ǵımaratttyń tarıhy
Rezıdentsııa tarıhy 1979 jyldan bastalady. Osy jyly Qazaqstan Kompartııasy Ortalyq Komıtetiniń birinshi hatshysy Dinmuhamed Qonaev Almatyda Lenın atyndaǵy mýzeıdiń fılıalyn salýdy tapsyrǵan bolatyn. Osylaısha, ǵımarat alǵashqyda murajaı kesheni retinde jobalanǵan.
Alaıda ǵımarattyń qurylys tek 1983 jyly bastalyp, 1986 jyly Jeltoqsan oqıǵasyna baılanysty toqtap qalady. Ǵımarat 1993 jylǵa deıin aıaqtalmaǵan kúıde boldy. Ol kezde nysan 90 paıyzǵa daıyn edi.
Elimiz táýelsizdik alǵannan keıin joba jańa maqsatta qaıta jandandy. Munda el Prezıdentiniń rezıdentsııasy ashylatyn boldy. Sáýletshiler - Q.Montahaev, O.Tsaı, O.Baımaǵambetov, Q.Nurmanbetov jáne konstrýktor T.Alpysbaev qazaq oıý-órnekterin zamanaýı formalarmen úılestire otyryp, ǵımaratty bezendirdi. Interer dızaınyn jasaýǵa sheteldik dızaınerler — De Shanel men E.Pıtaevskaıa (Frantsııa) qatysty.
Rezıdentsııa resmı memlekettik is-sharalardy ótkizýge arnaıy jobalanyp jasaldy. Onda shaǵyn keńseler jáne úlken zal keńistikteri boldy. Al ǵımarattyń batys jaǵynda Respýblıka alańymen úılesetin saıabaq salyndy.
2021 jyly ǵımarattyń qasbeti men jaryqtandyrýyn jańartý josparlanǵan bolatyn, biraq Qańtar oqıǵasyna baılanysty bul jumystar bastalǵan joq.
Eske salaıyq, 2022 jyly 5 qańtar kúni Prezıdent rezıdentsııasyn bir top adam basyp alyp, órtep jiberdi.
Keıin Memleket basshysynyń sheshimimen bul ǵımarat súrilip, onyń ornyna saıabaq salynatyny habarlandy.
Al mamandar Almatydaǵy Prezıdent rezıdentsııasy nelikten súriletinin túsindirdi. Sarapshylar rezıdentsııa ǵımaratyn qaıta jabdyqtap, ony paıdalaný qaýipsiz emes ekenin aıtty.
2022 jyly naýryz aıynda Almatydaǵy Prezıdent rezıdentsııasy tarıhı eskertkishter tiziminen alynyp tastaldy.
2022 jyly qazan aıynda Almaty ákimi Erbolat Dosaev Prezıdent rezıdentsııasyn súrý jumystary is júzinde aıaqtalǵanyn aıtty.