Almatyda Prezıdent rezıdentsııasy ornyndaǵy saıabaqtyń qurylysy qalaı júrip jatyr
ALMATY. KAZINFORM – Almatyda Nazarbaev dańǵylynyń batysy men Gandı kóshesiniń soltústiginde ornalasqan burynǵy Prezıdent rezıdentsııasynyń aýmaǵynda qurylys jumystary jalǵasyp jatyr. Munda jalpy aýdany 4,16 gektar bolatyn ınklıýzıvti qoǵamdyq skver salynyp jatyr. Kazinform fototilshisi qurylys alańyna baryp, qalanyń qaq ortasyndaǵy ózgeristerdi sýretke túsirip qaıtty.

Qazir ǵımaratty buzý jáne daıyndyq jumystary aıaqtaldy. Aýmaq abattandyrylyp jatyr. Qurylysshylar jerdi tegisteýdi qolǵa aldy.
Jobanyń negizgi elementteriniń biri – sý daıyndaý júıesi bar toǵan. Sonymen qatar ınjenerlik jeliler tartylyp, sýarý júıesine arnalǵan rezervýar qurylysy jalǵasyp jatyr.

– Joba aıasynda jasyl jelek otyrǵyzý, sý daıyndaý júıesimen jabdyqtalǵan toǵan, syrtqy jaryqtandyrý, ınjenerlik ınfraqurylym men qoǵamdyq keńistikter qarastyrylǵan. Qys mezgilinde muz aıdynyn uıymdastyrý josparda, - dep málimdedi Almaty qalasynyń qoǵamdyq keńistikterdi damytý basqarmasy.

Atalǵan aýmaqta bıiktigi alty metrden asatyn 50 iri aǵash otyrǵyzyldy. Saıabaq ınklıýzıvti bolady – jobalaý kezinde qala turǵyndarynyń barlyq sanatynyń qajettilikteri eskerilgen: pandýstar men múmkindigi shekteýli jandarǵa arnalǵan yńǵaıly baǵyttar qarastyrylǵan.

Qalalyq qoǵamdyq keńistikterdi damytý basqarmasynyń málimetinshe, jumystar bekitilgen kestege sáıkes júrgizilip jatyr jáne turaqty baqylaýǵa alynǵan.

Jobanyń birinshi kezeńin júzege asyrý úshin bıýdjetten 944,5 mln teńge bólingen. Onyń ishinde qurylys jumystaryna bólingen negizgi soma – 821,4 mln teńge. Al avtorlyq jáne tehnıkalyq qadaǵalaýǵa 3,3 mln teńge jáne 18,7 mln teńge qarastyrylǵan.

Bıýdjet shyǵyndaryn ońtaılandyrý maqsatynda jobaǵa jeke qarajatty tartý arqyly qosymsha qarjylandyrý kózdelgen. Demeýshiler qarajatynyń jalpy somasy – 2,2 mlrd teńge. Bul qarajat qaıtarymsyz negizde usynyldy.

Eske salaıyq, Prezıdent rezıdentsııasynyń ornyndaǵy jańa saıabaq qandaı bolatynyn jazǵanbyz. Onda qys kezinde jumys isteıtin muz aıdynyn ashý, arnaıy avtoturaq daıyndaý, 1,5 myń aǵash otyrǵyzý jáne ózge de jumystar josparlanǵan.


2022 jyly 5 qańtar kúni Prezıdent rezıdentsııasyn bir top adam basyp alyp, órtep jiberdi. Sondyqtan Memleket basshysynyń sheshimimen bul ǵımarat súrilip, onyń ornyna saıabaq salynatyny habarlandy.
Keıin Mamandar Almatydaǵy Prezıdent rezıdentsııasy nelikten súriletinin túsindirdi.


2022 jyly naýryz aıynda Almatydaǵy Prezıdent rezıdentsııasy tarıhı eskertkishter tiziminen alynyp tastaldy.


2022 jyly qazan aıynda Almatynyń burynǵy ákimi Erbolat Dosaev Prezıdent rezıdentsııasyn súrý jumystary is júzinde aıaqtalǵanyn aıtty.