Almatyda Prezıdent rezıdentsııasy ornyndaǵy saıabaq qashan ashylady
ALMATY. KAZINFORM — Almatyda Nazarbaev dańǵylynyń batysy men Gandı kóshesiniń soltústiginde ornalasqan jańa saıabaq qoldanysqa beriledi.
Almaty ákimdiginiń málimetinshe, buryn Prezıdent rezıdentsııasy bolǵan aýmaqta qazir qurylys jumystary aıaqtalýǵa jaqyn. Respýblıka kúnine oraı ashý josparlanǵan saıabaq qazir 97% daıyn.
Onda qysta muz aıdyny retinde paıdalanylatyn toǵan salynǵan. Odan bólek jaıaý júrginshiler men júgirý joldary, asfalt jabyndysy, avtosýarý jáne syrtqy jaryqtandyrý júıesin ornatý jumystary aıaqtalýǵa jaqyn. 95 qylqanjapyraqty jáne 228 japyraqty kóshet, 469 qylqanjapyraqty jáne 384 japyraqty buta otyrǵyzylǵan, sondaı-aq kópjyldyq ósimdikter egilgen.
— Sonymen qatar eski qorshaýdyń metall qurylymdary men irgetasyna restavratsııa jumystary júrgizilip jatyr. Qurylys tolyq aıaqtalǵan soń skver qala turǵyndary men qonaqtary úshin jańa demalys aımaǵyna aınalmaq. Almaty ákimi jaryq shamdarynyń sanyn arttyrýdy jáne kógaldandyrý kezinde jergilikti taldar men butalardyń túrine basymdyq berýdi tapsyrdy, — dep habarlady ákimdikte.
Eske salaıyq, 2022 jyly 5 qańtar kúni Prezıdent rezıdentsııasyn bir top adam basyp alyp, órtep jiberdi. Sondyqtan Memleket basshysynyń sheshimimen bul ǵımarat súrilip, onyń ornyna saıabaq salynatyny habarlandy.
2022 jyly naýryz aıynda Almatydaǵy Prezıdent rezıdentsııasy tarıhı eskertkishter tiziminen alynyp tastaldy.
Saıabaq qurylysyna memlekettik bıýdjet pen jeke ınvestorlar qarjysy jumsaldy. Demeýshiler qaıtarymsyz negizde 2,2 mlrd teńge bóldi.
Buǵan deıin Prezıdent rezıdentsııasynyń ornyndaǵy jańa saıabaq qandaı bolatynyn jazǵanbyz.