Almatyda poıyzdaǵy ýlaný oqıǵasy boıynsha qylmystyq is qozǵaldy
ALMATY. KAZINFORM – Almaty-2 temirjol vokzalynda bolǵan jappaı ýlaný faktisi boıynsha qylmystyq is qozǵaldy. Bul týraly Kóliktegi polıtsııa departamenti habarlady.
Vedomstvonyń málimetinshe, Almaty-1 stantsııasyndaǵy jelilik polıtsııa basqarmasy QR Qylmystyq kodeksiniń 156-baby (Eńbekti qorǵaý qaǵıdalaryn buzý) boıynsha qylmystyq is tirkegen.
– Qazirgi ýaqytta oqıǵanyń barlyq mán-jaıyn anyqtaý úshin qajetti tergeý amaldary júrgizilip jatyr. Tergeý nátıjeleri boıynsha zańdy protsessýaldyq sheshim qabyldanady. Ózge aqparat QR QPK-niń 201-babyna sáıkes jarııa etilmeıdi, - dep habarlady Kóliktegi polıtsııa departamentiniń baspasóz qyzmeti.
Eske salaıyq, Almaty-2 temirjol vokzalynda adamdar tabıǵı gazdan ýlanyp, 52 adam medıtsınalyq kómekke júgingen edi. Olardyń arasynda balalar da bar. On bala aýrýhanaǵa jatqyzylyp, ekeýi jansaqtaý bólimine túsken.
