Almatyda poıyzda 52 adam ýlandy: eki bala jansaqtaý bóliminde jatyr

ALMATY. KAZINFORM – Almaty-2 temirjol vokzalynda adamdar tabıǵı gazdan ýlandy.

QTJ málimetinshe, poıyz «Jolaýshylar tasymaly» AQ-nyń qaraýynda emes. Bul quram jeke menshik tasymaldaýshyǵa tıesili bolyp shyqty.

– Vagondar kınostýdııaǵa túsirilim júrgizý maqsatynda berilgen. Qazirgi ýaqytta oqıǵanyń barlyq mán-jaıyn tıisti organdar anyqtap jatyr, - delingen habarlamada.

Al Almaty qoǵamdyq densaýlyq saqtaý basqarmasynyń málimetinshe, oqıǵa ornyna 13 jedel járdem brıgadasy jiberilgen. Barlyǵy 52 adam, onyń ishinde balalar da zardap shekken. Olar qaladaǵy medıtsınalyq mekemelerdiń qabyldaý bólimderine jetkizilip, tolyq tekserýden ótti. 

Medıtsınalyq qyzmet ókilderi 10 balanyń aýrýhanaǵa jatqyzylǵanyn habarlady. Sonyń ishinde ekeýi jansaqtaý bóliminde, qalǵany profıldi bólimshelerde em alyp jatyr. Basqa naýqastar alǵashqy kómek kórsetilgennen keıin ambýlatorlyq baqylaýǵa jiberilgen.

– Aýrýhanaǵa jetkizilgenderdiń jaǵdaıy dárigerlerdiń baqylaýynda. Barlyq naýqas qajetti medıtsınalyq kómekpen tolyq qamtamasyz etilgen, - dep habarlady vedomstvo.

Eske salaıyq, buǵan deıin Túrkistan oblysynda bir otbasynan jeti adam ıis tıip ýlanǵanyn habarlaǵanbyz.